İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 262 Hüküm no: 223 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed ile boşadığı karısı Emine’nin mehir, nafaka ve sâir evlilik hukukuyla alakalı olarak birbirlerinin zimmetlerini ibra ettikleri Mahmiye-i İslambol’da Salih Paşa mahallesinde sâkine ve zâtı Seyyid Ahmed b. Mustafa ve Ali b. Mehmed nâm kimesneler şehâdetleriyle mu‘arrefe olan Emine bt. Hasan nâm hatun meclis-i şer‘-i şerîf-i enverde zevc-i mutallıkı işbu bâ‘isü’l-kitâb el-Hâc Mehmed b. Mehmed nâm kimesne mahzarında ikrâr-ı tâm edip mezbûr el-Hâc Mehmed zevc-i dâhilim olup târih-i kitâb günü beni talâk-ı selâse ile tatlîk etmekle zimmetinde mütekarrir ve ma‘kūdun-aleyh mehr-i müeccelim olan yüz guruş ve nafaka-i iddet ve meûnet-i süknâm için bi’t-terâzî ta‘yîn olunan on guruş ki cem‘an yüz on guruşu mezbûr el-Hâc Mehmed tamamen bana def‘ u teslîm ben dahi bi’t-tamam ahz u kabz edip mehr-i mezkûra ve hukūk-ı zevciyete ve sâire müte‘allika âmme-i da‘vâdan herbirimiz âharın zimmetini ibrâ ve herbirimiz ber-vech-i muharrer âharın ibrâsını kabûl eyledik dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu Fî 23 min-Cumâdelâhire sene 1185. Şuhûdu’l-hâl: Ali b. Mehmed, Seyyid Ahmed b. Mustafa, Ali b. Abdullah, İsmail b. Ali, Muhzırân Kethudâsı Mehmed Ağa.