İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 263 Hüküm no: 225 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habbâz Serkiz’in Doğancılar Fırını ile değirmende satın aldığı altı sehim gedik hissesinin üzerine tescil olunduğu Habbâz tâifesinden işbu hâmilü’r-rakīm Serkiz v. Agop nâm zimmî meclis-i şer‘-i şerîf-i enverde takrîr-i kelâm edip medîne-i Üsküdar’da vâki‘ Doğancılar Fırını demekle ma‘rûf bir bâb fırın ve ona merbût Çavuşbaşı nâm mahâlde vâki‘ beş horos değirmen derûnunda mevcûd gedik ta‘bîr olunur yirmi re’s bargir ve sâir âlât-ı lâzıme-i ma‘lûme yirmi sehim i‘tibârıyla on iki sehim hisse-i şâyi‘asını bundan akdem hâlik olan Avanis v. Mardiros nâm zimmînin yedinde mülkü iken hayatında zikrolunan on iki sehim hisse-i şâyi‘asında altı sehim hisse-i şâyi‘asını semen-i ma‘lûm-ı makbûza safka-i vâhide ile bana bey‘ ve temlîk ve teslîm ben dahi iştirâ ve kabz edip bu vechile yedimde mülk-i müşterâm olduğu Kapan-ı dakīk defterine üzerime kaydolunmuşidi hâlâ ekmekçiler [kethudâsı] ve nizâm ustalarına suâl ve yedime hüccet-i şer‘iye i‘tâ olunmak matlûbumdur dedikde Ekmekçiler Kethudâsı Ali Ağa b. Abdurrahman ve nizâm ustalarından Ahmed b. el-Hâc Hüseyin ve Hasan bin Hüseyin ve Mehmed b. el-Hâc İsmail ve Ali b. Mustafa ve Mustafa b. Mehmed ve Ali b. Mehmed ve Mustafa b. Mehmed nâm kimesneler ile Markos v. Semayel ve Bogos v. Kirkor ve Haçador v. Asvador nâm zimmîler fi’l-vâki‘ mârrü’z-zikr fırın ve değirmen ve derûnunda mevcûd gedik ta‘bîr olunur yirmi re’s bargir ve sâir âlât-ı lâzıme-i ma‘lûme yirmi sehim i‘tibârıyla altı sehim hisse-i şâyi‘ası hâlik-i merkūm Avanis’den müşterâ olmak üzere Kapan-ı dakīk defterinde merkūm Serkiz’in üzerinde mastûr ve mukayyeddir deyü herbiri alâ-tarîkı’ş-şehâde haber vermeleriyle hıfzan li’l-makāl mâ vaka‘a bi’t-taleb ketb olundu. Fî 21 min-Cumâdelâhire sene 1185. Şuhûdu’l-hâl: Ahmed b. Hüseyin, Muhzırân Kethudâsı Mehmed Ağa, Ali b. Mustafa ve Ekmekçiler Kethudâsı Ali.