İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 265 Hüküm no: 228 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Turşucu tâifesinin talebi ile İbrahim Usta’nın üzerlerine kethudâ tayin olunduğu Âsitâne-i aliyye’de vâki‘ turşucu tâifesinden yiğitbaşıları Mehmed Usta b. Ahmed ve müsinn ü ihtiyâr ustalarından Hüseyin b. Mehmed ve Mehmed b. Nesib ve Ali b. Hasan ve Osman b. Halil ve el-Hâc Osman b. Receb ve Ali b. Hüseyin [73b] ve Hüseyin b. Musa ve el-Hâc Ali b. Ahmed ve Ali b. Hasan ve Hasan b. İbrahim ve Osman b. Halil ve Abdülkadir b. Mustafa ve Hasan b. Mehmed ve Mustafa b. Mehmed ve sâirleri meclis-i şer‘-i şerîf-i enverde herbiri takrîr-i kelâm edip mukaddemâ bâ-hüccet-i şer‘iye kethudâmız olan İsmail Usta fevt olup kethudâlık umûru mu‘attal kalmağla beynimizde vâki‘ olan mesâlihimizi rü’yet için bir kethudâ nasbından lâ-büd olmağla işbu hazır bi’l-meclis İbrahim Usta b. Musa cümlemizin muhtârı ve nizâm ve intizâmımızı idâreye her vechile kādir olmağlın cümlemiz ittifâklarıyla üzerimize kethudâ nasb ü ta‘yîn olunmak matlûbumuzdur deyü iltimâs etmeleriyle hâkim-i a‘la’l-kitâb -rafa‘a kadrehû mevlâhü’l-vehhâb- hazretleri dahi işbu sahibü’l-kitâb mezbûr İbrahim Usta’yı kıbel-i şer‘den tâife-i mezbûreye kethudâ nasb ü ta‘yîn buyurduklarında ol dahi kabûl ve hidemât-ı lâzımesini kemâ-yenbagī ikāmete ta‘ahhüd etmeğin mâ vaka‘a bi’t-taleb [ketb olundu.] Fî 26 Cumâdelâhire sene 1185.