İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 265 Hüküm no: 229 Orijinal metin no: [73b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki bezzâz ve abacılar tâifesi kethudâsı İsmail Çelebi’nin yerinde bırakılması ve eski kethudâları Yakub’un müdâhalesinin men‘i Ma‘rûz Mahmiye-i İslambol’da ve tevâbi‘inde vâki‘ bezzâzân ve abacıyân tâifesinin yiğitbaşıları Ahmed Çelebi b. Ahmed ve müsinn ü ihtiyârlarından Seyyid Hacı Mehmed b. Mustafa ve Seyyid el-Hâc Mustafa b. Mehmed ve Seyyid Mehmed Ali ve Seyyid Hüseyin b. Mustafa ve Seyyid Ahmed b. Mehmed ve Seyyid Mustafa b. Seyyid Mehmed ve Halil Ağa b. Hasan ve Hacı Abdullah b. Musa ve el-Hâc İsmail b. Yakub ve el-Hâc Mustafa b. Ahmed ve el-Hâc Âmed b. Musa ve Mehmed Sâdık b. İshak ve Mehmed Çelebi b. Musa ve Beşiktaşlı Ahmed Ağa b. Hasan ve Mütevellî Mustafa b. Hacı Ali ve Zeynelabidin ve Hâfız Mehmed nâm kimesneler ve sâirleri Zindânkapısı’nda vâki‘ zimmî ustalarından Ustabaşı Kostantin v. Yamandi, Apostol ve Manol ve Panayot ve Yorgi ve Yamandi ve Dimitri ve Kiryazi ve Kiryako ve Yanaki ve diğer Yanaki ve Nikola ve Nedelko ve Mitro ve Manol Vezneciler’de vâki‘ Tamo ve Manol ve Nano ve Anekli ve Şirvan ve Yorgi ve Tarakko ve Praşkova ve İstico ve Ayvansaray’da vâki‘ Tersotelkaki ve Yorgi ve Edirnekapısı’nda vâki‘ Aliço ve Piyovelaz ve İstefan ve İspiro nâm zimmîler meclis-i şer‘-i şerîf-i enverde hâlâ tâife-i mezbûreden bâ-berât-ı âlîşân kethudâları olan râfi‘u hâze’l-kitâb İsmail Çelebi b. el-Hâc Ahmed nâm kimesnenin vekîl-i sâbitü’l-vekâlesi olan Mehmed Çelebi b. Mehmed nâm kimesne mahzarında herbiri takrîr-i kelâm edip işbu hazır bi’l-meclis Yakub b. el-Hâc Osman nâm kimesne mukaddemâ kethudâmız olup cümlemizi rencîdeden hâlî olmadığına binâen kendiden teşekkî eylediğimizde ol dahi rızâsıyla kethudâlık-ı merkūmu vekîl-i mezbûr İsmail’e kasr-ı yed etmişidi hâlâ kethudâlık husûsuna müdâhale etmekle bir vechile mezbûr Yakub’un kethudâ olmasına râzı değilleriz deyü tekrar teşekkî ve müvekkil-i mezbûr İsmail’den her vechile [74a] hoşnûd ve râzılar olup kemâ-fi’l-evvel kethudâlıkda ibkā birle kıbel-i şer‘den dahi nasb ü ta‘yîn olunmak matlûbumuzdur deyü iltimâs etmeleriyle hâkim-i muvakkı‘-ı sadr-ı kitâb tûbâ lehû ve hüsnü-meâb hazretleri dahi mezbûr Yakub’u kethudâlığa müdâhaleden ba‘de’l-men‘ bi’l-cümle esnâf-ı mezbûrûn iltimâsları üzere müvekkil-i mezbûr İsmail Çelebi’yi kemâ-fi’l-evvel kethudâlıkda ibkā birle kıbel-i şer‘den dahi nasb ü ta‘yîn buyurduklarında vekîl-i mezbûr dahi bi’l-vekâle kabûl ve esnâf-ı mezbûrenin umûr ve husûslarını alâ vechi’l-istikāme rü’yete bi’l-vekâle ta‘ahhüd etmeğin mâ vaka‘a bi’t-taleb ketb olundu Fî 7 Receb sene 1185. Şuhûdu’l-hâl: Muhzırân Kethudâsı Mehmed Ağa b. Ahmed, İsmail Çelebi b. Halil, İsmail Çelebi b. Abdullah, Ali Çelebi b. Abdullah, el-Hâc Mustafa b. Hamza.