İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 266 Hüküm no: 230 Orijinal metin no: [74a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sahak ve Mosis’in Vâlide Fırını’ndaki gedik hisselerini sattıkları Mahmiye-i İslambol’da Şehremîni kurbünde Vâlide Fırını demekle ma‘rûf bir bâb fırın ve fırın-ı merkūma merbût on horos değirmen derûnunda mevcûd gedik ta‘bîr olunur kırk nefer (re’s) bargir ve sâir âlât-ı lâzıme-i ma‘lûme kırk sehim i‘tibârıyla üç sehim hisse-i şâyi‘asına bâ-i‘lâm mutasarrıf olan Sahak v. Mosis nâm zimmî ve yine mârrü’z-zikr kırk sehimden on iki sehim hisse-i şâyi‘asına mutasarrıf olan Mosis v. Avanis nâm zimmî meclis-i şer‘-i şerîf-i enverde işbu hâmilü’r-rakīm Anton v. Haçador nâm zimmî muvâcehesinde herbiri ikrâr-ı tâm edip akd-i âti’z-zikrin sudûruna değin yedimizde mülk ve hakkımız olmağla merkūm Sahak hâlâ ben mârrü’z-zikr fırın ve değirmen derûnunda yedimizde mevcûd gedik ta‘bîr olunur kırk re’s bargir ve sâir âlât-ı lâzıme-i ma‘lûme kırk sehim i‘tibârıyla üç sehim hisse-i şâyi‘amı tarafeynden îcâb ve kabûlü hâvî bey‘-ı bâtt-ı sahîh-i şer‘î ile üç yüz yetmiş guruşa merkūm Anton’a bey‘ ve temlîk ve teslîm eylediğimde ol dahi iştirâ ve temellük [ve] kabûl edip ve merkūm Mosis hâlâ ben mârrü’z-zikr fırın ve değirmen derûnunda mevcûd gedik ta‘bîr olunur kırk re’s bargir ve sâir âlât-ı lâzıme-i ma‘lûmeden kırk sehim i‘tibârıyla olan on iki sehim hisse-i şâyi‘amdan üç sehim hisse-i şâyi‘amı tarafeynden îcâb ve kabûlü hâvî bey‘-ı bâtt-ı sahîh-i şer‘î ile üç yüz yetmiş guruşa merkūm Anton’a bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm [ve] kabûl eylediğinden sonra meblağ-ı mezbûr üçer yüz yetmiş guruşu herbirimiz merkūm Anton yedinden tamamen ahz u kabz edip semenine ve mebî‘-i mezkûrun tağrîr ve gabnine müte‘allika âmme-i da‘vâdan herbirimiz âharın zimmetini ibrâ eyleyip ve herbirimiz âharın ibrâsını kabûl eyledik fîmâ-ba‘d mârrü’z-zikr kırk sehimden merkūm Sahak benim üç sehim hisse-i şâyi‘amın ve merkūm Mosis benim on iki sehimden üç sehim hisse-i şâyi‘am ki cem‘an altı sehim hisse-i şâyi‘a merkūm Anton’un mülk-i müşterâsı ve hakk-ı sırfı olmuşdur dediklerinde gıbbe’t-tasdîk mâ vaka‘a [bi’t-taleb ketb olundu.] Fî 9 Receb sene 1185. Şuhûdu’l-hâl: Kanlıfırın Ustası Molla Ahmed, el-Hâc Ebûbekir, Salıcı Molla Osman, Ekmekçi Kethudâsı Ali, Usta Markos, Semail v. Karabet ve gayruhum.