İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 267 Hüküm no: 231 Orijinal metin no: [74b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarrâf Serkiz’in Salih Ağa’ya olan borcunu beş ay içerisinde ödemeye söz verdiği hakkında terkin edilmiş kayıt Sehv olunup tekrar i‘lâm sicilline kaydolunmuşdur. < Sahib-i arzuhâl Sarrâf Serkiz v. Avanis nâm zimmî meclis-i şer‘de Seyyid Salih Ağa b. el-Hâc Ali muvâcehesinde mezbûr Seyyid Salih Ağa zimmetinde yedime verdiği mümzâ ve mahtûm ve mu‘anven ve mersûm bir kıt‘a deyn temessükü mantûkunca cihet-i deyn-i şer‘îden beynimizde ahz u i‘tâ cereyânıyla ba‘de külli’l-hesâb bin sekiz yüz guruş hakkım olup hatta cihet-i mezkûreden bana mikdâr-ı mezkûr deyni olduğunu mahzar-ı şuhûdda ikrâr dahi etmekle hâlâ meblağ-ı mezkûr bin sekiz yüz guruşu mezbûr Seyyid Salih Ağa’dan taleb ederim deyü da‘vâ eyledikde mezbûr Salih Ağa fi’l-vâki‘ ber-vech-i muharrer cihet-i mezkûreden merkūm Serkiz’e meblağ-ı mezkûr deyni olduğunu ikrârından mâ‘adâ el-Hâc Süleyman b. Ahmed ve Bostânî Osman b. Ömer nâm kimesneler dahi alâ-tarîkı’ş-şehâde haber vermeleriyle mûcebince meblağ-ı mezkûr bin sekiz yüz guruşun edâsıyla mezbûr Seyyid Salih Ağa ilzâm olundukdan sonra Seyyid Salih Ağa meblağ-ı mezkûru târih-i i‘lâmdan beş ay tamamında tamamen ve müeccelen edâya ta‘ahhüd eyledikde merkūm Serkiz dahi râzı olup kat‘-ı nizâ‘ eyledikleri mübâşirleri Ali Çavuş kulları ma‘rifetiyle huzûr-ı âlîlerine i‘lâm olundu. Fî 14 Receb sene 1185>>