İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 269 Hüküm no: 233 Orijinal metin no: [75a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Efendi’nin mütevellisi olarak tasarrufunda olan Şeyhzâde bt. Yusuf Vakfı’na ait menzili ve tevliyetini rızasıyla III. Ahmed’in kızı Zeyneb Sultan’a devrettiği Merhûm ve mağfûrun-leh Sultân Ahmed-i Sâlis -tâbe serâhu- hazretlerinin semere-i a‘râk-ı tayyibe ve fürû‘-ı şecere-i sülâle-i tâhireleri olan kerîmât-ı tâhirât-ı celîlelerinden ser-levha-i muhadderât-ı muhtereme ve pîrâye-i mestûrât-ı mükerreme -dâmet fî-hıfzi’l-meliki’l-mennân- devletli ismetli iffetli Zeyneb Sultân -aliyyetü’ş-şân- hazretlerinin mahmiye-i İslambol’da Ayasofya-i kebîr mahallesinde Kaya Sultân Sarayı demekle arîf saray-ı âlîleri ittisâlinde vâki‘ ashâb-ı hayrâtdan merhûme Şeyhzâde bt. Yusuf’un tevliyet ve süknâsı rûh-ı vâkıfeye üçer İhlâs-ı şerîf ve birer Fâtiha-i şerîfe tilâvet etmek üzere sulehâ ve sâlihâtdan bir kimesneye meşrûta vakfı olup bir tarafdan sâbıkā Bağdad kādısı Şamlı Mehmed Efendi menzili ve iki tarafdan saray-ı âlî-i mezkûr hamam-ı kebîrinin su hazînesi ve arsaları duvarı ve bir tarafdan tarîk-i âm ile mahdûd terbî‘an beş yüz yedi zirâ‘ arsa üzerinde mebnî ulyâda iki bâb oda ve sagīr iki bâb şirvanlı kamara ve sofa ve vüstâda bir sagīr oda ve dehliz ve süflâda bir ahır ve kömürlük ve memşâ ve matbah ve bi’r-i mâ ve bahçe ve müştemilât-ı sâireli bir bâb menzile tevcîh-i hâkimü’ş-şer‘le mutasarrıf olan Kâtib-i hüccet-i muhâsebe Ali Efendi b. Mehmed meclis-i şer‘-i şerîf-i enverde sahibetü hâze’l-kitâb safiyetü’s-sıfât güzîde-i benâtü’l-hakanî mûmâ-ileyhâ Zeyneb Sultân-ı aliyyetü’ş-şân hazretlerinin taraflarından zikri câ’î husûsu tasdîka vekîl-i şer‘îleri olan kapıkethudâları Seyyid Hasan Ağa b. Seyyid İsmail mahzarında ikrâr-ı tâm edip menzil-i mahdûd-ı mezkûrun Sultân-ı müşârün-ileyhâ hazretlerine iktizâ ve lüzûmu olduğuna binâen menzil-i mezkûru ve tevliyeti hüsn-i rızâ ve tayyib-i ihtiyârımla Sultân-ı müşârün-ileyhâ hazretlerine ferâğ ve kasr-ı yed eyledim ba‘de’l-yevm menzil-i mezkûr keyfe mâ yeşâ‘ ve yahtâr bi’l-yümn ve’l-ikbâl zabt u tasarruf buyursunlar dedikde hâkim-i muvakkı‘-ı sadr-ı kitâb -rafa‘a kadrehû mevlâhü’l-vehhâb- hazretleri dahi şart-ı vâkıfe üzere menzil-i mahdûd-ı mezkûru ve tevliyetini mezbûr Ali kasr-ı yedinden zümre-i sâlihâtdan olduğu sikāt-ı sahîhatü’l-kelimât [75b] Müslimîn-i muvahhidîn ihbârlarıyla lede’ş-şer‘i’l-mutahhar zâhir ve nümâyân olan müşârün-ileyhâ Zeyneb Sultân-ı aliyyetü’ş-şân hazretlerinin kıbel-i şer‘den tevcîh ve ta‘yîn etdiklerinde vekîl-i mezbûr dahi mukırr-ı merkūm Ali Efendi’yi vicâhen ve şifâhen tahkīk ve tasdîk edip ol vechile menzil-i mezkûr müşârün-ileyhâ hazretlerinin dâhil-i havza-i tasarrufları olmağla zabt u tasarrufları’çün işbu sahîfe-i sahîha alâ-mâ hüve’l-vâki‘ bi’l-ibtigā ketb [olundu.] Fî 22 Receb sene 1185.