İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 270 Hüküm no: 234 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi’nin tasarrufunda olan Şeyhzâde bt. Yusuf Vakfı’na ait menzili ve tevliyetini rızasıyla Ali Efendi’ye devrettiği Ashâb-ı hayrâtdan merhûme Şeyhzâde bt. Yusuf’un tevliyet ve süknâsı rûh-ı vâkıfa üçer İhlâs-ı şerîf ve bir Fâtiha-i şerîfe tilâvet etmek üzere sulehâ ve sâlihâtdan bir kimesneye meşrûta vakfı olup mahmiye-i İslambol’da Ayasofya-i kebîr mahallesinde Kaya Sultân Sarayı demekle ma‘rûf gurretü cibilliyeti’s-sa‘âdeti’l-bâhire zübtedü’l-muvakkarâti’l-mükerreme fer‘-i şecere-i sülâle-i saltanat Zeyneb Sultân-ı aliyyetü’ş-şân hazretlerinin saray-ı âlîleri ittisâlinde vâki‘ bir tarafdan sâbıkā Bağdad kādısı Şamlı Mehmed Efendi menzili ve iki tarafdan zikrolunan saray-ı âlînin kebîr hamamının su hazînesi ve arsalar duvarı ve bir tarafdan tarîk-i âm ile mahdûd terbî‘an beş yüz yedi zirâ‘ arsa üzerinde mebnî ulyâda iki bâb oda ve iki sagīr Şirvanlı kamara ve sofa ve vüstâda bir sagīr oda ve dehliz ve süflâda bir ahır ve kömürlük ve memşâ ve bi’r-i mâ ve matbah ve bahçeyi müştemil köhne bir bâb menzile tevcîh-i hâkimü’ş-şer‘le mutasarrıf olan el-Hâc İbrahim Efendi b. el-Hâc Hasan meclis-i şer‘-i lâzımü’t-teşrîfde Kâtib-i hüccet-i muhâsebe bâ‘isü’l-vesîka Ali Efendi b. Mehmed mahzarında ikrâr-ı tâm edip ben menzil-i mahdûd-ı mezkûru ve tevliyeti hüsn-i rızâ ve tayyib-i ihtiyârımla merkūm Ali Efendi’ye ferâğ ve kasr-ı yed edip kıbel-i şer‘den yedine vesîka i‘tâ olunmak matlûbumdur dedikde hâkim-i muvakkı‘-ı a‘la’l-kitâb -rafa‘a kadrehû mevlâhü’l-vehhâb- hazretleri dahi menzil-i mahdûd-ı mezkûru ve tevliyeti mezbûr el-Hâc İbrahim Efendi’nin kasr-ı yedinden zümre-i sâlihînden olduğu zeyl-i vesîkada muharrerü’l-esâmî Müslimîn ihbârlarıyla lede’ş-şer‘i’l-enver zâhir ve mütehakkık olan merkūm Ali Efendi’ye ber-mûceb-i şart-ı vâkıfe tevcîh ve ta‘yîn buyurduklarında ol dahi mukırr-ı merkūmu cemî‘ kelimâtında vicâhen ve şifâhen tahkīk ve tasdîk etmeğin zabt u tasarrufi’çün işbu vesîka alâ-mâ hüve’l-vâki‘ bi’t-taleb ketb ü imlâ ve yedine i‘tâ olundu Fî 25 min-Receb sene 1125. Şuhûdu’l-hâl: Seyyid Molla Ali b. Derviş Hasan, Mehmed Râşid Efendi, Ahmed b. Mehmed Beşe, Mehmed Ârif b. el-Hâc Ali, Mehmed Emin b. el-Hâc Abdullah ve gayruhum.