İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 270 Hüküm no: 235 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. III. Ahmed Han’ın kızı Zeyneb Sultan’ın tasarrufunda olan Şeyhzâde bt. Yusuf Vakfı’na ait harap vakıf menzilini yeniden yapmasına izin verildiği Ashâb-ı hayrâtdan merhûme Şeyhzâde bt. Yusuf’un süknâsı sulehâ ve sâlihâtdan bir kimesneye meşrûta vakfı olup mahmiye-i İslambol’da Ayasofya-i kebîr mahallesinde Kaya Sultân Kerîmesi Sarayı demekle arîf saray-ı âlî ittisâlinde vâki‘ bir tarafdan sâbıkā Bağdad kādısı Şamlı Mehmed Efendi menzili ve iki tarafdan saray-ı mezkûrun hamam-ı kebîrinin su hazînesi ve arsa duvarı ve bir tarafdan tarîk-i âm ile mahdûd ulyâda iki oda ve iki sagīr şirvânlı kamara ve vüstâda bir sagīr oda ve dehliz ve süflâda bir ahır ve kömürlük ve memşâ ve bi’r-i mâ ve matbah ve bahçeyi müştemil bir bâb köhne menzile bi’l-yümn ve’l-ikbâl hâlâ mutasarrıfe olan umdetü’l-muhadderâti’l-mu‘azzama ve pîrâye-i mestûrât-ı mükerreme âftâb-ı ufk-ı mekremiyet Sultân Ahmed Han-ı Sâlis hazretlerinin kerîmât-ı tâhirât-ı celîlelerinden devletli ismetli iffetli Zeyneb Sultân-ı aliyyetü’ş-şân -dâmet fî-hıfzi’l-meliki’l-mennân- hazretlerinin menzil-i mezkûru müceddeden binâ etmek irâde-i aliyyeleri olmağla taraf-ı devletlerinden şeref-mend vekâletleriyle müşerref olduğu ber-nehc-i şer‘î sâbit olan Seyyid Hasan Ağa b. Seyyid İsmail meclis-i şer‘-i şerîf-i enverde bi’l-vekâle takrîr-i kelâm ve ta‘bîr ani’l-merâm edip menzil-i mezkûr mürûr-ı eyyâmla müşrif-i harâb ve mâil-i türâb olmağla bazı mahalleri münhedim ve bazı mahalleri inhidâma mâil ve bir vechile kābil-i süknâ olmadığından mâ‘adâ enkāz balyası dahi müntefe‘un-bih olmayıp müstehleke kabîlinden ve cânib-i vakf-ı mezbûrda menzil-i mezkûru ta‘mîr ve tecdîde mevkūf malı olmayıp arsası rûh-ı vâkıfa üçer İhlâs-ı şerîf ve birer Fâtiha-i şerîfe tilâvet etmek üzere vakfiyetde ba‘de’l-ibkā müvekkilem müşârün-ileyhâ hazretleri arsa-i mezbûre üzerine malıyla nefsi’çün mülkü olmak üzere ebniye ihdâs etmek irâde-i aliyyeleri olmağla müceddeden ber-minvâl-i muharrer ebniye-i mezkûrenin mülkiyetine kıbel-i şer‘den izin verilmek bi’l-vekâle matlûbumdur dedikde hakīkat-i hâl vekîl-i mezbûrun takrîr-i meşrûhu üzere olduğu zeyl-i vesîkada muharrerü’l-esâmî Müslimîn ihbârlarıyla lede’ş-şer‘i’l-enver zâhir ve mütehakkık oldukdan sonra hâkim-i muvakkı‘-ı sadr-ı kitâb -rafa‘a kadrehû mevlâhü’l-vehhâb- hazretleri dahi ânifen zikri mürûr eden köhne bir bâb menzilin arsası üzerine malıyla mülkü olmak üzere nefsi’çün müceddeden ebniye ihdâs etmek üzere müvekkile-i müşârün-ileyhâ hazretlerine kıbel-i şer‘den izin vermeğin mâ vaka‘a bi’t-taleb ketb ü imlâ olundu Fî 25 Recebi’l-ferd sene 1185.