İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 271 Hüküm no: 236 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tülbentçi, yemenîci, alacacı ve bezzâz esnafının talebi ile üzerlerine Hasan b. Abdullah’ın kethudâ tayin olunduğu Âsitâne-i aliyye’de vâki‘ dülbendci ve yemenîci ve alacacı ve bezzâz esnâfının müsinn ü ihtiyârlarından el-Hâc Mehmed b. el-Hâc Ahmed ve el-Hâc Hüseyin b. Yusuf ve Seyyid Ahmed b. Seyyid Abdurrahim ve el-Hâc Ahmed b. el-Hâc Ahmed ve el-Hâc İbrahim b. el-Hâc Veliyüddin ve el-Hâc Mehmed b. el-Hâc Hüseyin ve Mehmed b. İbrahim ve İbrahim b. Mehmed ve el-Hâc Abdurrahman b. Salih ve Ömer b. Hüseyin nâm kimesneler ile Papaoğlu Karabet ve İstefan v. Kigork ve Sefer v. Simoda ve Maryempoli v. Toma ve Bogos v. Şahin ve Artin v. Mircan ve Pananos v. Aydın ve Agaman v. Agamcan ve Marat v. İstefan ve Aladeoğlu Avanis ve Kirkor v. Haçuk ve Mızmız Avanis v. Karabet ve sâir zimmîler meclis-i şer‘-i şerîf-i enverde yine esnâf-ı merkūmeden işbu râfi‘u’l-kitâb el-Hâc Hasan b. Abdullah nâm kimesne mahzarında herbiri takrîr-i kelâm ve ta‘bîr ani’l-merâm edip bâ-hüccet-i şer‘iye kethudâmız olan işbu hazır bi’l-meclis el-Hâc İbrahim b. Abdullah kethudâlık umûrunu idâreden aczi hasebiyle hüsn-i rızâsıyla bi’l-külliye kasr-ı yed etmekle beynimizde vâki‘ olan umûr ve mesâlihimizi rü’yet ve idâre ve hidemât-ı sâiremizi ikāmet için bir kethudâ nasbından lâ-büd olup ve mezbûr el-Hâc Hasan cümlemizin muhtârı ve örf ve âdetimize vâkıf ve nizâm [ve] intizâmımızı mûcib olan umûr ve ahvâlimize kemâ-yenbagī ârif ve her vechile idâreye kādir olmağla üzerimize kıbel-i şer‘-i enverden mezbûr el-Hâc Hasan kethudâ nasb ü ta‘yîn olunmak matlûbumuzdur deyü iltimâs etmeleriyle a‘lâ-yı kitâbı tevkī‘-i müstetâbı ile tezyîn buyuran hâkim-i hâsim efendi hazretleri mezbûr el-Hâc Hasan’ı esnâf-ı mezbûrenin talebleri ile kethudâ nasb ü ta‘yîn ve mu‘tâdlarını alâ vechi’l-istikāme rü’yet etmek üzere tenbîh buyurduklarında ol dahi kabûl ve hilâf-ı şer‘-i mutahhar hareket etmeyip kadîmî üzere umûr ve husûslarını rü’yet ve idâreye müte‘ahhid olmağın mâ vaka‘a bi’t-taleb ketb olundu. Fî 21 Recebi’l-mürecceb sene 1185. Şuhûdu’l-hâl: Osman b. Hamza, Ali b. Abdullah, İsmail b. Ali, el-Hâc Mustafa b. Hasan, Muhzırân Kethudâdsı Mehmed Ağa b. Ahmed.