İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 272 Hüküm no: 237 Orijinal metin no: [76b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın Fındıklı kasabasındaki uncu değirmeninde gedik hissesini Eyüb b. Ebubekir’e sattığı Mahrûse-i Galata’ya muzâfe kasaba-i Fındıklı’da İskele başında vâki‘ dört horos uncu değirmeni derûnunda mevcûd gedik ta‘bîr olunur on altı re’s bargir ve sâir âlât-ı lâzıme-i ma‘lûme on altı sehim i‘tibârıyla dört sehmi Seyyid Ahmed Ağa b. Seyyid Mustafa’nın ve beş sehmi Seyyid el-Hâc Eyüb b. Ebûbekir’in ve üç sehmi Seyyid el-Hâc Mehmed’in ve üç sehmi Seyyid Süleyman b. Seyyid Mehmed Ağa’nın ve bir sehmi el-Hâc Osman yedlerinde sâbıkā mülkleri olduğu lede’ş-şer‘i’l-enver zâhir oldukdan sonra mezbûr Seyyid Ahmed Ağa [b.] Seyyid Mustafa meclis-i şer‘-i şerîf-i enverde müşteriki işbu râfi‘u’l-kitâb mezbûr Seyyid el-Hâc Eyüb b. Ebûbekir muvâcehesinde ikrâr ve takrîr-i kelâm edip [77a] mârrü’z-zikr değirmen derûnunda mevcûd gedik ta‘bîr olunur on altı re’s bargir ve sâir âlât-ı lâzıme-i ma‘lûme on altı sehim i‘tibârıyla dört sehim hisse-i şâyi‘ası akd-i âti’z-zikrin sudûruna değin yedimde mülk olmağla hâlâ ben zikrolunan dört sehim hisse-i şâyi‘amı tarafeynden îcâb ve kabûlü hâvî şürût-ı müfsideden ârî bey‘-ı bâtt-ı sahîh-i şer‘î ve safka-i vâhide ile beş yüz yirmi beş guruşa mezbûr Seyyid el-Hâc Eyüb’e bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezkûr beş yüz yirmi beş guruşu mezbûr Seyyid el-Hâc Eyüb yedinden tamamen ahz u kabz edip semenine ve bey‘-ı mezkûrun tağrîr ve gabnine müte‘allika âmme-i da‘vâdan herbirimiz âharın zimmetini ibrâ ve ıskāt ve herbirimiz ber-vech-i muharrer âharın ibrâsını kabûl eyledik fîmâ-ba‘d mârrü’z-zikr dört sehim hisse-i şâyi‘am dahi mezbûr Seyyid el-Hâc Eyüb’ün mülk-i müşterâsı ve hakk-ı sırfı olup benim kat‘a alâka ve medhalim kalmamışdır mârrü’z-zikr değirmen derûnunda mevcûd gedik ta‘bîr olunur on altı re’s bargir ve sâir âlât-ı lâzıme-i ma‘lûme on altı sehim i‘tibârıyla dokuz sehmi mezbûr Seyyid el-Hâc Eyüb’ün ve üç sehmi mezbûr el-Hâc Mehmed’in ve üç sehmi mezbûr Seyyid Süleyman’ın ve bir sehmi el-Hâc Osman’ın şâyi‘an mülkleridir dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 25 Recebi’l-mürecceb sene 1185. Şuhûdu’l-hâl: Hasan Usta b. Hüseyin, Molla Ahmed b. Hüseyin, Molla Hasan b. Abdullah, Mehmed Ağa b. el-Hâc İsmail, Ahmed Ağa b. el-Hâc Hüseyin, Uncular Kethudâsı Mustafa b. Ahmed, Ekmekçiler Kethudâsı Ali b. Abdurrahman.