İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 273 Hüküm no: 238 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habbâz Mıgırdıç’ın Galata’daki bir fırın ve değirmendeki gedik hissesini sattığı Habbâz tâifesinden Mıgırdıç v. Serkiz nâm zimmî meclis-i şer‘-i şerîf-i enverde yine tâife-i mezbûreden işbu hâmilü’r-rakīm Nörsiz v. Agop nâm zimmî muvâcehesinde ikrâr-ı tâm ve takrîr-i kelâm edip mahrûse-i Galata’da Zincirli Han tahtında vâki‘ bir bâb fırın ve ona merbût yine Galata’da Kürkçükapısı dâhilinde vâki‘ dört horos değirmen derûnunda mevcûd gedik ta‘bîr olunur on altı re’s bargir ve sâir âlât-ı lâzıme-i ma‘lûme on altı sehim i‘tibârıyla dört sehim hisse-i şâyi‘amı akd-i âti’z-zikrin sudûruna değin yedimde mülküm olmağla hâlâ ben mârrü’z-zikr fırın ve değirmende olan dört sehim hisse-i şâyi‘amı tarafeynden îcâb ve kabûlü hâvî şürût-ı müfsideden ârî bey‘-ı bâtt-ı sahîh-i şer‘î ve safka-i vâhide ile yedi yüz elli guruşa merkūm Nörsiz’e bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr yedi yüz elli guruşu merkūm Nörsiz yedinden tamamen ahz u kabz edip semenine ve bey‘-ı mezkûrun tağrîr ve gabnine müte‘allika âmme-i da‘vâdan herbirimiz âharın zimmetini ibrâ ve ıskāt ve herbirimiz âharın ibrâsını ber-vech-i muharrer kabûl eyledik fîmâ-ba‘d mârrü’z-zikr fırın ve değirmende mevcûd gedik ta‘bîr olunur on altı re’s bargir ve sâir âlât-ı ma‘lûme on altı sehim i‘tibârıyla [77b] dört sehim hisse-i şâyi‘asını merkūm Nörsiz’in mülk-i müşterâsı ve hakk-ı sırfı olup benim kat‘a alâka ve medhalim kalmamışdır dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 23 Recebi’l-mürecceb sene 1185. Şuhûdu’l-hâl: Hasan Usta b. Hüseyin, Molla Mustafa b. el-Hâc Mehmed el-Hâc Mahmud b. el-Hâc İbrahim, Ahmed Ağa b. el-Hâc Hüseyin, Ekmekçiler Kethudâsı Ali Ağa b. Adurrahman, Markos v. Semayel, Mikayil v. İstefan, Bogos v. Aleksan ve gayruhum.