İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 275 Hüküm no: 240 Orijinal metin no: [78a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sebzeci Dilo’nun aldığı sekiz yüz kuruş borç karşılığında sebzeci dükkânını içerisindeki malzemelerle birlikte Aşçıbaşı Ali Ağa’ya rehin verdiği Sebzeci tâifesinden Dilo v. Niko nâm zimmî meclis-i şer‘-i şerîf-i enverde hâlâ kāimmakām-ı sadr-ı âlî aşcıbaşısı olan fahrü’l-akrân râfi‘u hâze’l-kitâb Ali Ağa b. Abdullah tarafından husûs-ı âti’z-zikrde vekîl olduğu Abdullah Ağa b. Ali ve Hasan b. Mehmed nâm kimesneler şehâdetleriyle sâbit olan el-Hâc Mustafa b. Abdurrahman nâm kimesne mahzarında Sebzeciler Kethudâsı İsmail Ağa b. Hasan hazır olduğu hâlde ikrâr-ı tam ve takrîr-i kelâm edip benim müvekkil-i mezbûr Ali Ağa’ya cihet-i karzdan sekiz yüz guruş deynim olup İslambol’da Tavukpazarı’nda Ali Paşa Câmi‘i karşısında vâki‘ iki tarafdan berber dükkânı ve bir tarafdan terziler odaları ve bir tarafdan tarîk-i âm ile mahdûd fevkānî bir bâb oda ve havluyu müştemil bir bâb mülk sebzeci dükkânımız meblağ-ı mezkûr sekiz yüz guruş mukābelesinde müvekkil-i mezbûr Ali Ağa’ya vefâen bey‘ ve teslîm ve derûnunda mevcûd gedik ta‘bîr olunur bir fıçı ve kebîr ve sagīr iki kantar ve bir terâzi ve ma‘a dirhem ve sâir âlât-ı lâzıme-i ma‘lûme dahi deynim olan meblağ-ı mezkûr sekiz yüz guruş mukābelesinde rehin vaz‘ ve teslîm eyledim dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 23 Receb sene 1185. Şuhûdu’l-hâl: el-Hâc Mustafa b. Hasan, Osman b. Mehmed, Ali Çelebi b. Abdullah, İsmail Çelebi b. Ali, Muhzırân Kethudâsı Mehmed Ağa.