İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 278 Hüküm no: 242 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha Hatun’un Rumelihisarı’nda yalı tabir olunan evini Mühürdârzâde Abdurrahman Bey Vakfı’na bağışladığı Mahrûse-i Galata’ya muzâfe İstinye nâhiyesine tâbi‘ Rumelihisarı’nda el-Hâc Kemâl mahallesinde sâkine Sâliha Hatun bt. el-Hâc Mehmed tarafından husûs-ı âtîde vekîl olduğu Ahmed b. Hasan ve Abdullah b. Ahmed’in şehâdetleri [ile] sâbit olan oğlu Mustafa Said Ağa b. Mehmed Efendi meclis-i şer‘-i şerîf-i enverde ashâb-ı hayrâtdan Mühürdârzâde Abdurrahman Bey’in medîne-i Siroz’da Kirişçi Kurt mahallesi ahâlîlerinin tekâlîfleri ve cihat-ı sâiresi için mevkūfe ve akāra tebdîli meşrûta nükūdunun bi’l-fî‘l mütevellîsi bâ‘isü’l-kitâb vâkıf-ı mezbûr Abdurrahman Bey b. Mustafa mahzarında bi’l-vekâle ikrâr-ı tâm ve takrîr-i kelâm edip zikrolunan el-Hâc Kemâl mahallesinde vâki‘ bir tarafdan [79b] <> Nurullah Çelebi mülkü ve bir tarafdan leb-i deryâ ve iki taradan yine tarîk-ı âm ile mahdûd ve fevkānî üç bâb oda ve bir sofa ve iki matbah ve dehliz ve tahtânî bir oda ve kenîf ve liman ve damlalık ve havlu ve iki sokak kapısını hâvî yalı ta‘bîr olunur bir bâb menzil bâ-hücec-i şer‘iyye müvekkilem mezbûrenin yedinde mülk hakkı olmağla menzil-i mahdûd-ı mezkûru bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile vakf-ı mezbûra akār olmağı’çün mütevellî-i mezbûra iki bin beş yüz guruşa bi’l-vekâle bey‘ ve teslîm eylediğimde ol dahi ber-minvâl-i muharrer iştirâ ve tesellüm ve kabûl eyledikden sonra semen-i meblağ-ı mezbûr iki bin beş yüz guruşun üç yüz elli guruşunu mal-ı vakf-ı mezbûrdan müvekkilem mezbûre def‘ ve teslîm ol dahi ahz u kabz ve mâ‘adâ iki bin yüz elli guruşunu zikri câ’î mu‘acceleye takās taraf-ı vakıfdan bi’l-vekâle ibkā eyledim fîmâ-ba‘d menzil-i mahdûd-ı mezkûr vakf-ı merkūm müstagallâtından olup müvekkilem mezbûrenin alâka ve medhali kalmamağla mütevellî-i vakf-ı merkūm dahi ba‘de’l-mukāssa ve’l-kabûl menzil-i mahdûd-ı mezkûru taraf-ı vakıfda ibkā olunan meblağ-ı mezbûr iki yüz elli guruş icâre-i mu‘accele ve târih-i kitâbdan beher yevm ikişer akçe icâre-i müeccele ile müvekkile-i mezbûre Sâliha Hatun îcâr ve tefvîz ol dahi ber-minvâl-i muharrer istîcâr ve tefevvüz ve kabûl edip mebî‘-i mezkûrun tağrîr ve gabnine mu‘accele-i müstehleke-i mezbûrenin adem-i istifâsına ve bi’l-cümle husûs-ı mezbûra müte‘allika-i âmme-i da‘vâdan cânib-i vakf-ı merkūmu ve mütevellî-i mezbûrun zimmetini ibrâ-i âm ile bi’l-vekâle ibrâ ve ıskāt eyledim dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 27 Cumâdelâhire sene 1185. Şuhûdü’l-hâl: Mehmed Emin Efendi b. el-Hâc Abdullah, Mehmed Râşid Efendi b. el-Hâc İsmail, Ahmed Efendi b. Pîrî, el-Hâc Mehmed Ârif Efendi b. Mehmed, Mehmed Ârif Efendi b. el-Hâc Ali.