İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 279 Hüküm no: 243 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Muhtesib İskender mahallesi sâkinlerinden Ebûbekir Efendi’nin vakıf arsasına yaptığı mülk evinin oğluna verildiği Mahmiye-i İslambol’da Muhtesib İskender mahallesinde vâki‘ etrâf-ı erba‘ası Hattât Efendi ve suyolcu Abdullah Çelebi ve tarîk-ı hâs ve âm ile mahdûd ve ma‘lûmü’l-hudûd ve’l-müştemilât süknâsı ulemâdan bir recüle meşrûta vakıf menzile tevcîh-i hâkimü’ş-şer‘le mutasarrıf olan mevâlî-i izâmdan el-Hâc Ebûbekir Efendi b. Süleyman fevt olup süknâ-yı menzil-i mezkûr mahlûl olmağla müteveffâ-yı mûmâ-ileyhin mukaddemâ menzil-i mezkûr arsasında mülkü olmak üzere bi’l-izni’ş-şer‘î ve bâ-hüccet-i keşf kendi nefsi’çün ihdâs eylediği binâsının kıymeti veresesi beyninde ba‘de’t-taksîm mâ‘adâ arsa-i mevkūfe ile ebniye-i kadîme-i mevkūfesini süknâya eşedd-i ihtiyâcı mütehakkık olan işbu bâ‘isü’l-kitâb müteveffâ-yı mûmâ-ileyhin sulbî oğlu Süleyman süknâ-yı menzil-i mezbûru hâkim-i muvakkı‘-ı sadr-ı kitâb tûbâ lehû ve hüsnü-meâb efendi hazretlerinin ber-mûceb-i şart-ı vâkıf tevcîh buyurmalarıyla tasarrufi’çün işbu vesîka-i enîka kıbel-i şerî‘at-i garrâdan ketb ü tahrîr ve yedine i‘tâ olundu. Fî 12 Şa‘bânü’l-mu‘azzam sene 1185. Şuhûdü’l-hâl: Merhabazâde Mahmud, Başkâtib Mehmed Emin Efendi, Feyzullah Âbid Efendi b. Ahmed, Hâfız Hüseyin Efendi b. Mustafa, Muhzırân Kethudâsı Mehmed Ağa b. Ahmed, Seyyid Osman b. Seyyid Hüseyin, el-Hâc Mustafa b. Hasan.