İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 280 Hüküm no: 244 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fırıncı Yuvan’ın Müslüman olan oğlu Ali’nin iki oğluna kendisine ait değirmendeki gedik hissesinden birer hisse sattığı Habbâz tâifesinden Yuvan v. Royo nâm zimmî meclis-i şer‘-i şerîf-i enverde oğlu olup mukaddemâ şeref-i İslâmla müşerref olan Ali’nin oğulları râfi‘ay hâze’l-kitâb Abdurrahman ve Süleyman nâm kimesneler taraflarından husûs-ı âti’z-zikrde vekîl-i sâbitü’l-vekâlesi olan Hasan Usta b. Hüseyin nâm kimesne mahzarında ikrâr ve takrîr-i kelâm edip mahmiye-i İslambol’da Balatkapısı dâhilinde Mahkemealtı nâm mahâlde vâki‘ bir bâb fırın ve ona merbût Ayvansaray dâhilinde altı horos değirmen derûnunda mevcûd gedik ta‘bîr olunur yirmi dört re’s bargir ve sâir âlât-ı lâzıme-i ma‘lûme yirmi dört sehim i‘tibâriyle dört sehim hisse-i şâyi‘ası akd-i âti’z-zikrin sudûruna değin yedimde mülk ve hakkım olmağla hâlâ ben mârrü’z-zikr dört sehim hisse-i şâyi‘amdan müvekkilân-ı mezbûrâna oğlumun oğulları Abdurrahman ve Süleyman’dan herbirine bir sehim olmak üzere iki sehim hisse-i şâyi‘amı tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile her bir sehimi yüz ellişer guruşdan cem‘an üç yüz guruşa müvekkilân-ı mezbûrân Abdurrahman ve Süleyman’a bey‘ ve temlîk ve teslîm eylediğimde ol dahi bi’l-vekâle iştirâ ve temellük ev tesellüm ve kabz ve kabûl eyledikden sonra meblağ-ı mezbûr üç yüz guruşu vekîl-i mezbûr yedinden tamamen ahz u kabz edip semenine [ve] bey‘-i mezkûrun tağrîr ve gabnine müte‘allika-i âmme-i da‘vâdan herbirimiz âharın zimmetini ibrâ ve ıskāt eyledikde fîmâ-ba‘d mârrü’z-zikr fırın ve değirmen derûnunda mevcûd gedik ta‘bîr olunur yirmi dört re’s bargir ve sâir âlât-ı lâzıme-i ma‘lûme yirmi dört sehim i‘tibâriyle dört sehim hisse-i şâyi‘amın herbirine birer sehim olmak üzere iki sehim hisse-i şâyi‘amı oğlumun oğulları müvekkilân-ı mezbûrân Abdurrahman ve Süleyman’ın mülk-i müşterâları ve hakk-ı sırfları olmuşdur dedikde gıbbe’t-tasdîkı’ş-şer‘î mâ vaka‘a [bi’t-taleb ketb olundu.] Fî-gurret-i Şa‘bânü’l-mu‘azzam sene 1185. Şuhûdü’l-hâl: Ekmekçiler Kethudâsı Ali Ağa, Ahmed Ağa ve Hasan Usta.