İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 281 Hüküm no: 245 Orijinal metin no: [80a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çelebioğlu mahallesinde oturan Damgacızâde Mehmed Ağa ile Mısırlı Mehmed ve zevcesi Ayşe arasındaki anlaşmazlığın giderildiği Mahmiye-i İslambol’da Alacahamam kurbünde Çelebioğlu mahallesinde sâkin Damgacızâde demekle ma‘rûf işbu râfi‘ü’l-kitâb el-Hâc Mehmed Ağa b. el-Hâc Ali nâm kimesne meclis-i şer‘-i şerîf-i enverde Duhancılar Kethudâsı Hasan Ağa b. Mehmed nâm kimesne mahzarında Mısırlı Mehmed b. Abdullah ve zevcesi mu‘arrefetü’z-zât Âişe bt. el-Hâc Mustafa hazır olduğu hâlde ikrâr-ı tâm ve takrîr-i kelâm edip mezbûre Âişe’nin <> hâl-i sıgārında babam mezbûr el-Hâc Ali vasîsi olup kendiye teslîm olunandan mâ‘adâ mezbûr Hasan Ağa mezbûre Âişe tarafından vekâleten babam mezbûrdan hâric-i ez-defter-i kassâm iddi‘â eylediği on iki bin beş yüz guruşdan bi’l-vekâle bin guruşa sulh olup bedel-i sulh-ı mezkûr bin guruş ve mezbûr Mısırlı Mehmed’in bundan akdem Kadı karyesinde vâki‘ menzilinde piştov kurşunu ile beni bi-gayr-ı hakkın darb ve cerh eyledi deyü da‘vâsından bin guruşa sulh olup [80b] zikrolunan bedel-i sulh-ı mezkûr bin guruş ve mezbûre Âişe Kadı karyesinde vâki‘ ma‘lûmü’l-hudûd ve’l-müştemilât vakıf menzil ve bağ ve bahçe ve bostan beş sehim i‘tibâriyle mutasarrıfe olduğu beş sehimden bir sehimi vâlidem Fâtıma Hatun’a bâ-ma‘rifet-i mütevellî üç bin guruş bedel mukābelesinde fâriğa olup meblağ-ı mezkûr üç bin guruş mukaddemâ bâ-hüccet-i şer‘iyye beynimizde ma‘lûm husûslar için iki bin beş yüz yetmiş guruş ki min-haysü’l-mecmû‘ yedi bin beş yüz yetmiş guruşu ben mâlımdan mezbûr Hasan Ağa’ya bi’d-defa‘ât def‘ ve teslîm ol dahi yedimden bi’t-tamam ve’l-kemâl bi’l-vekâle ahz u kabz eyledikden sonra medfû‘um olan meblağ-ı mezkûr yedi bin beş yüz yetmiş guruşa ve bi’l-cümle târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı sâireye müte‘allika-i âmme-i de‘âvî ve kâffe-i mutâlebât ve eymân [ve] muhâsamâtdan mezbûr Hasan Ağa ile zevcân-ı mezbûrân Mısırlı Mehmed ve Âişe’den herbirinin zimmetlerini ibrâ ve ıskāt eylediğimde mezbûr Mısırlı Mehmed zikrolunan cinâyete ve mezbûr Âişe dahi mârrü’z-zikr Kadı karyesinde olan menzil ve bağ ve bahçe ve bostanda olan bir sehimine ve gedik husûsuna ve babasından müntakil miras husûsuna ve sâir beynimizde cereyân eden hukūk-ı şer‘iyyeye ve mezbûr Hasan Ağa dahi mukaddemâ yedimde mâlım olan Hüsnü nâm abd-i memlûkümü beş yüz guruşa ben mezbûr Hasan Ağa’ya bey‘ ol dahi iştirâ edip ba‘dehû bi’t-terâzî bey‘-i mezkûr[u] fesh [ve] ikāle etmemiz ile gulâm-ı mesfûra ve sâir hukūk-ı ma‘lûme ve mechûleye müte‘allika-i âmme-i da‘vâdan mezbûr Hasan Ağa ve zevcân-ı mezbûrân Mısırlı Mehmed ve Âişe’den herbiri benim babam mezbûr el-Hâc Ali’nin ve vâlidem mezbûre Fâtıma’nın ve gulâm-ı mesfûrun zimmetlerimizi ibrâ ve ıskāt edip ve herbirimiz ber-vech-i muharrer âharın ibrâsını kabûl eyledik fîmâ-ba‘d zikrolunan husûsa müte‘allika herbirimiz âhar ile da‘vâ ve nizâ‘ımız kalmadı dedikde gıbbe’t-tasdîkı’ş-şer‘î zevcân-ı mezbûrân Mısırlı Mehmed ve Âişe meclis-i şer‘de mezbûr Hasan Ağa muvâcehesinde herbiri ikrâr ve takrîr-i kelâm edip mezbûr Hasan Ağa el-Hâc Mehmed Ağa’dan bi’l-vekâle makbûzu olan yedi bin beş yüz yetmiş guruşu tamamen bize def‘ u teslîm biz dahi bi’t-tamam ahz u kabz edip zimmetinde bir akçe ve bir habbe bâkī kalmayıp meblağ-ı mezkûra ve sâire müte‘allika âmme-i da‘vâdan mezbûr Hasan Ağa’nın zimmetini ibrâ ve ıskāt ol dahi ibrâmızı kabûl eyledi dediklerinde gıbbe’t-tasdîk mezbûr el-Hâc Mehmed’in nefsine ve hîn-i mutâlebede meclis-i şer‘e ihzârına Seyyid Yusuf Çelebi b. Mehmed ve Hüseyin Efendi b. İsa nâm [kimesneler] kendi kefîlleri olmağın mâ vaka‘a bi’t-taleb ketb olundu. Fî 2 Şa‘bânü’l-mu‘azzam sene 1185. [81a] Şuhûdü’l-hâl: Ali Çelebi b. Abdullah, el-Hâc Süleyman b. Ahmed, el-Hâc Hasan b. Ali, Hasan Efendi b. Hüseyin, Halil Ağa b. Mehmed, Hasan Efendi b. Mehmed, Mahalle-i mezbûre imâmı İbrahim Efendi b. İsmail, Mustafa Çavuş b. Mehmed, Mehmed Beşe b. Ahmed, Hasan b. Mustafa, İshak Çelebi b. Hasan, Muhzırân Kethudâsı Mehmed Ağa.