İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 282 Hüküm no: 246 Orijinal metin no: [81a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Turfanda bt. Aleksan’ın Topkapı’da bulunan fırın ve değirmendeki gedik hissesini sattığı Mahmiye-i İslambol’da Topkapısı dâhilinde câmi‘ kurbünde vâki‘ fırın [ve] beş horos değirmen derûnunda mevcûd yirmi re’s bargir ve sâir âlât-ı lâzıme-i ma‘lûme kırk sehim i‘tibâriyle on üç sehimi Hayogon oğlu Artin nâm zimmînin ve on iki sehimi Melkon nâm zimmînin ve sekiz sehimi Ezbik kızı Ağya Nasrâniyenin ve iki sehimi Marta nâm Nasrâniyenin ve iki sehimi Anna nâm Nasrâniyenin ve üç sehimi Turfanda nâm Nasrâniyenin şâyi‘an herbirinde mülkleri olduğu lede’ş-şer‘i’l-enver zâhir oldukdan sonra merkūme Turfanda bt. Aleksan v. Kirkor nâm Nasrâniye tarafından husûs-ı âti’z-zikrde vekîl olduğu şahs-ı merkūmeyi ârifân Karabet v. Artin ve Bogos v. Serkiz nâm zimmîler şehâdetleriyle sâbit olan Petram v. Serkiz nâm dahi meclis-i şer‘-i şerîf-i enverde işbu hâmilü’r-rakīm Melkon v. Abkar nâm zimmî muvâcehesinde ikrâr-ı tâm ve takrîr-i kelâm edip mârrü’z-zikr fırın <> ve değirmen derûnunda mevcûd gedik ta‘bîr olunur yirmi re’s bargir ve âlât-ı lâzıme-i ma‘lûme kırk sehim i‘tibâriyle üç sehim hisse-i şâyi‘ası müvekkilem merkūm Turfanda’nın akd-i âti’z-zikrin sudûruna değin yedinde mülk ve hakkı olmağla hâlâ ben müvekkilem merkūmenin mârrü’z-zikr fırın ve değirmende olan üç sehim hisse-i şâyi‘asını tarafeynden îcâb ve kabûlü hâvî şürût-ı müfsideden ârî bey‘i bâtt-ı sahîh-i şer‘î ve safka-i vâhide ile yirmi sekiz bin akçeye merkūm Melkon’a bi’l-vekâle bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezkûr yirmi sekiz bin akçeyi ve derûnunda sermâye olmak üzere yirmi bin akçe bi-tarîkı’l-havâle merkūm Melkon’dan tamamen bi’l-vekâle ahz u kabz edip semenine ve mebî‘-i mezkûrun tağrîri ve gabnine ve gedik husûsuna ve mârrü’z-zikr sermâyeye müte‘allika âmme-i da‘vâdan merkūm Melkon’un zimmetini bi’l-vekâle ibrâ ve ıskāt eyledim fîmâ-ba‘d mârrü’z-zikr fırın ve beş horos değirmen derûnunda mevcûd ve yirmi re’s bargir ve sâir âlât-ı lâzıme-i ma‘lûme kırk sehim i‘tibâriyle müvekkilem merkūme Turfanda’nın üç sehim hisse-i şâyi‘ası merkūm Melkon’un mülk-i müşterâsı ve hakk-ı sırfı olup müvekkilem merkūme Turfanda’nın alâka ve medhali kalmamışdır dedikde gıbbe’t-tasdîk mâ vaka‘a bi’t-taleb [ketb olundu.] Fî 3 Şa‘bân sene 1185. Şuhûdü’l-hâl: Seyyid el-Hâc Ebûbekir b. el-Hâc Mehmed, Molla Mustafa b. el-Hâc Mehmed, Ahmed Ağa b. el-Hâc Hüseyin, Ekmekçiler Kethudâsı Ali Ağa, Hasan Usta, Markos v. Samuel, Agop v. Serkiz, Mikail ve İstefan.