İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 283 Hüküm no: 247 Orijinal metin no: [81b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu Osman Ağa ile Ali Ağa’nın Mimar Acem mahallesinde bulunan değirmen gediklerini sattıkları Uncu tâifesinden Seyyid Osman Ağa ile es-Seyyid Ali Ağa meclis-i şer‘-i şerîf-i enverde işbu hâmilü’r-rakīm Agop v. Serkiz nâm zimmî muvâcehesinde ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahmiye-i İslambol’da Mimar Acem mahallesinde vâki‘ Yayla Değirmeni demekle ma‘rûf bir bâb iki horos değirmen derûnunda mevcûd sekiz re’s bargir ve sâir âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfsideden ârî bey‘i bâtt-ı sahîh-i şer‘î ve safka-i vâhide ile dokuz yüz guruşa merkūm Agop’a bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezkûr dokuz yüz guruşu merkūm Agop yedinden tamamen ahz u kabz eyleyip semenine ve bey‘-i mezkûrun tağrîr ve gabnine ve gedik husûsuna müte‘allika âmme-i da‘vâdan herbirimiz âharın zimmetini ibrâ ve ıskāt ve herbirimiz âharın ibrâsını kabûl eyledik fîmâ-ba‘d mârrü’z-zikr değirmen derûnunda mevcûd gedik ta‘bîr olunur sekiz re’s bargir ve sâir âlât-ı lâzıme-i ma‘lûme merkūm Agop’un mülk-i müşterâsı ve hakk-ı sırfı olup benim kat‘â alâka ve medhalim kalmamışdır dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 15 Şa‘bân sene 1185. Şuhûdü’l-hâl: Molla Mustafa b. el-Hâc Mehmed, el-Hâc Mahmud b. İbrahim, Ahmed Ağa b. el-Hâc Hüseyin, Uncular Kethudâsı Mustafa b. Ahmed, Ekmekçiler Kethudâsı Ali Ağa, Hasan Usta b. Hüseyin, Salıcı Molla Osman, Molla Hasan b. Abdullah, Molla Ali b. Ferhad.