İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 284 Hüküm no: 249 Orijinal metin no: [82a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Basmacıların Fazıl Paşa Sarayı dışında damgasız yemenî basmayacaklarını taahhüt ettikleri Basmacı tâifesinden olup mahmiye-i İslambol’da Şehremîni kurbünde sâkin Seyyid Mustafa b. İbrahim ve Altımermer’de sâkin Seyyid Ömer b. Ali ve Kaliçeciler Köşkü’nde sâkin Mehmed b. Abdullah ve Silivrikapısı’nda sâkin İbrahim b. Mehmed ve yine Silivrikapısı’nda sâkin Ahmed b. Mehmed nâm kimesneler ile Sulu Manastır’da mütemekkin Manataskan? v. Yoseb ve Hasköy’de sâkin Bedros v. Simon nâm zimmîler meclis-i şer‘-i şerîf-i enverde kethudâları işbu râfi‘ü’l-kitâb el-Hâc Mahmud Ağa mahzarında herbiri ikrâr-ı tâm ve takrîr-i kelâm edip biz basmacı esnâfından olup Hudâvendigâr-ı esbak Sultân Ahmed Hân-ı Sâlis hazretlerinin Enderûn-ı Hümâyûn’da kâin kütübhâne-i celîleleri müstagallâtından İstanbul’da Fazlı Paşa Sarayı’na basmacı tâifesi iskân olunup bâ-hatt-ı hümâyûn-ı şevket-makrûn bin yüz seksen dört senesi Rebî‘ülevveli’nin dördüncü günü târihiyle müverrah müceddeden verilen nizâmımız üzere i‘tâ buyrulan emr-i âlîşân zikrolunduğu üzere mârrü’z-zikr Fazlı Paşa Sarayı’ndan hâric mahallerde hilâf-ı evâmir-aliyye mugāyir-i nizâm yemenî basılmayıp ve damgasız kalb ve redî yemenî bulunur ise damgalanıp ve fîmâ-ba‘d hufyeten hilâf-ı emr-i âlî ve mugāyir-i nizâm damgasız kalb ve redî yemenî basmağa ve basdırmağa tesâddî eden basmacı ve dülbendci esnâfından her kangısı cesâret ederler ise ta‘zîr olunacaklarını emr-i âlîde musarrah biz bu esnâda mugāyir-i emr-i âlî menzillerimizde hufyeten yemenî basıp yemenî âlâtlarımız ile ahz ve muâhaze olunmuş idik. Lâkin fîmâ-ba‘d biz mârrü’z-zikr Fazlı Paşa Sarayı’nda basmacılık edip mugāyir-i evâmir-i aliyye hareket etmemek üzere herbirimiz ta‘ahhüd eylediğimizde kethudâ-yı mezbûr ve sâir ustalar bizi muâhazeden fâriğler olup ve mârrü’z-zikr Fazlı Paşa Sarayı’nda kalfalık etdirmek üzere ta‘ahhüd etmeleriyle eğer ba‘de’l-yevm menzillerimizde ve âhar mahallerde hufyeten yemenî basıp mugāyir-i emr-i âlî bizden hareket vâki‘ olur ise ber-mûceb-i emr-i âlî lâyıkı üzere hakkımızda tedîb ve ta‘zîr icrâ olunsun dediklerinde mukırrûn-ı mezbûrûnu kelimât-ı meşrûhalarını kethudâ-yı mezbûr tasdîk [etmeğin] mâ-vaka‘a [bi’t-taleb ketb olundu.] Fî 7 Şa‘bân sene 1185.