İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 286 Hüküm no: 251 Orijinal metin no: [82b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fazıl Efendi ve kızkardeşi Ayşe Hanım’ın Karaköy’de bulunan fırın arsasındaki haklarını Haçador v. Markos’a sattığı Medîne-i Hazret-i Ebî Eyyûb Ensârî mahallâtından Baba Haydar mahallesinde sâkine olup husûs-ı âti’z-zikrde kendi tarafından asîl ve kız karındaşı Âişe Hanım b. Abdülkadir Efendi tarafından vekîl olduğu zât-ı mezbûreyi ârifân el-Hâc Mustafa Ağa b. Mehmed ve Seyyid el-Hâc Hasan Efendi b. Seyyid Mustafa şehâdetleriyle sâbit olan Fazıl Efendi b. el-mezbûr Abdülkadir Efendi meclis-i şer‘-i şerîf-i enverde işbu hâmilü’r-rakīm Haçador v. Markos nâm zimmî muvâcehesinde bi’l-asâle ve bi’l-vekâle ikrâr-ı tâm ve takrîr-i kelâm edip mahmiye-i İstanbul’da Ahırkapı kurbünde Akbıyık mahallesinde vâki‘ bevvâb-ı sultânî merhûm el-Hâc Hasan Ağa binâ ve icrâ eylediği çeşme ve vilâyet-i Anadolu’da Çerkeş kazâsına tâbi‘ Çalıcaviran nâm karyede vâki‘ mescid-i şerîf vakfı müstagallâtından olup mahrûse-i Galata’da Karaköy Kapısı dâhilinde vâki‘ bir tarafdan pasdırmacı dükkânı üç tarafdan tarîk-ı âm ile mahdûd bir bâb fırın ve ittisâlinde dört horos değirmen merkūm Haçador’un yedinde olan temessükât mantûklarınca beş sehim i‘tibâriyle (…)herbiriyine merkūm Haçador’un bi’l-icâreteyn (…) [83a] (…) [bi’l-icâ]reteyn tasarrufumdadır ve (…) kız karındaşım mezbûre Âişe (…) bi’l-icâreteyn tasarrufunda iken (…) bi’l-külliye muhterık olup mârrü’z-zikr fırın (…) kaldıkdan sonra ben arsa-yı mezkûrda (…) hisse-i şâyi‘amı altı yüz guruş bedel tesmiyesiyle (…) merkūm Haçador’a bundan akdem ferâğ ve tefvîz [ol dahi tefe]vvüz ve kabûl ve kız karındaşım mezbûre Âişe Hanım [dahi] arsa-i mezkûrede olan bir sehim hisse-i şâyi‘ini üç yüz guruş bedel tesmiyesiyle bâ-ma‘rifet-i mütevellî merkūm Haçador’a kezâlik bundan akdem ferâğ ve tefvîz ol dahi tefevvüz ve kabûl edip meblağeyn-i mezkûreyn merkūm Haçador’un zimmetinde kalmış idi hâlâ benim iki sehim hissem için tesmiye olunan bedel-i mezkûr üç yüz guruş ki cem‘an doku[z] yüz guruşu merkūm Haçador tamamen bana def‘ ve teslîm ve ben dahi bi’t-tamam bi’l-asâle ve bi’l-vekâle ahz u kabz edip mârrü’z-zikr fırın ve değirmen arsasında olan iki sehim hisse ve kız karındaşım müvekkile-i mezbûrenin beher sehimi hissesine ve bedeline ve ihdâs eylediği ebniyeye müte‘allika âmme-i da‘vâdan merkūm Haçador’un zimmetini bi’l-asâle ve bi’l-vekâle ibrâ ve ıskāt edip ol dahi medfû‘u olan bedel-i mezkûr dokuz yüz guruşa müte‘allika âmme-i da‘vâdan bizim zimmetimizi ibrâ ve ıskāt edip ve herbirimiz âharın ibrâsını ber-vech-i muharrer kabûl eyledik fîmâ-ba‘d fırın ve değirmende bizim kat‘â alâka ve medhalimiz kalmayıp merkūm Haçador’un hakk-ı müveffezi olmuşdur dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 25 Şa‘bân sene 1185. Şuhûdü’l-hâl: Kethudâ-yı Muhzırân Mehmed Ağa, Osman Efendi b. Mehmed, Seyyid el-Hâc Hasan b. Seyyid Mustafa, el-Hâc Mustafa Ağa b. Mehmed