İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 287 Hüküm no: 253 Orijinal metin no: [84a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kurun Mahmud mahallesinde oturan Mültezim Çerkes Ağa’nın Sarrâf Hayim ve Yako’ya olan borcunun taksite bağlandığı Mahmiye-i İslambol’da Kurun Mahmud mahallesinde sâkin mültezim tâifesinden işbu râfi‘ü’l-kitâb Çerkes Ağa b. Abdullah meclis-i şer‘-i şerîf-i enverde Hasköy’de mütemekkin sarrâf tâifesinden olup husûs-ı âti’z-zikrde kendi tarafında asîl ve kız karındaşı Hayim v. Abram nâm Yahûdî tarafından İbrahim b. Halil ve Ali Çelebi b. Mehmed nâm kimesneler şehâdetleriyle sâbitü’l-vekâle vekîl olan Yako nâm Yahûdî muvâcehesinde takrîr-i kelâm edip yedinde olan iki yüz seksen bir senesi Saferü’l-hayr’ın sekizinci günü târihiyle müverrah [bir] kıt‘a i‘lâmda tafsîl ü beyân olduğu üzere cihet-i deyn-i şer‘îden zimmetinde yedi bin yüz kırk guruş ve yine bin yüz seksen dört senesi Saferü’l-hayrın yirmi sekizinci günü târihiyle müverrah bir kıt‘a i‘lâmda tafsîl olunduğu üzere kezâlik cihet-i deyn-i şer‘îden zimmetinde altı bin yüz yirmi üç guruş ki cem‘an on üç bin iki yüz altmış üç guruş merkūmân Hayim ve Yako’ya deynim olup meblağ-ı mezkûrun sekiz yüz guruşu târih-i i‘lâm günü merkūmân Hayim ve Yako’ya teslîm ve mâ‘adâ on iki bin dört yüz altmış üç guruşu hâlâ def‘aten edâya iktidârım olmayıp ber-vech-i âtî tecîl ve taksîte tâlib olduğumda merkūm Yako târih-i kitâbdan beher sene merkūmân Hayim ve Yako’ya bin guruş verip on iki senesi beş buçuk ay tamamında tamamen kendilerine edâ etmek üzere beni merkūm Yako asâleten ve vekâleten tecîl ve taksît eyledikde ben dahi kabûl ve ber-vech-i muharrer müeccelen ve mukāssatan edâya ta‘ahhüd eyledim dedikde gıbbe’t-tasdîkı’ş-şer‘î mâ vaka‘a [bi’t-taleb ketb olundu.] Şuhûdü’l-hâl: Mehmed b. Veliyüddin, el-Hâc Mustafa b. Mehmed, Müderrisîn-i kirâmdan İbrahim Nedim Efendi, Hamamcı el-Hâc Ahmed ve Duhancılar Kethudâsı Hasan.