İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 288 Hüküm no: 254 Orijinal metin no: [84b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akideci ve şeker şerbetçilerin dellâlı olan Avram v. Tomar’ın dellâllığı Tavil ve Avram’a devrettiği Âsitâne-i aliyyede vâki‘ akideci ve şeker şerbetçi tâifesinin şeker [bey‘] ve şirâlarında bâ-hüccet-i şer‘iyye dellâlları olan Avram v. Tomar [nâm] Yahûdî meclis-i şer‘-i şerîf-i enverde işbu hâmilü’r-rakīm Ta[vil] v. Mosi ve Avram v. İsak nâm Yahûdiler muvâcehelerinde Akideciler Kethudâsı Mustafa Ağa b. Şaban ve Yiğitbaşı Ahmed Ça[vuş] b. Ömer ve müsinn ve ihtiyârlarından el-Hâc Ömer b. Mustafa ve Derviş Mustafa b. Mehmed ve Ali b. Murtaza ve Yusuf b. Abdullah ve Şeker Şerbetçi Kethudâsı el-Hâc Ali b. Abdullah ve müsinn ve ihtiyârlarından Ahmed b. Abdullah ve el-Hâc Ali b. Mahmud ve Alemdâr Hasan b. Veliyüddin ve Ali [b.] Veliyüddin nâm kimesneler ile Hayim v. Rafail İlya v. Kili ve Mosi v. Danyel ve Hayim v. İsrail ve Mosi v. İsrail nâm Yahûdiler hazır oldukları hâlde ikrâr-ı tâm ve takrîr-i kelâm edip ben ve dellâllık-ı mezkûru kendi hüsn-i rızâm ile ve cümle kethudâ ve ustalar ma‘rifetl[eriyle] merkūmân Tavil ve Avram Yahûdilere müşterek olmak üzere kasr-ı yed eyledim kıbel-i şer‘den dahi dellâllık-ı merkūma merkūmân nasb ü ta‘yîn olunsun dedikde hâkim-i muvakkı‘-ı sadr-ı kitâb refe‘a kadrehû mevlâhü’l-vehhâb efendi hazretleri dahi cümle ustalarına taleb ve iltimâsıyla merkūmân Tavil ve Avram merkūm Avram yerine dellâl nasb ve ta‘yîn ve ber-mu‘tâd-ı kadîm hizmet-i lâzımelerini rü’yete tenbîh buyurduklarında onlar dahi kabûl ve ber-vech-i muharrer hizmet-i lâzımelerini edâya ta‘ahhüd etmeğin mâ vaka‘a bi’t-taleb ketb olundu. Fî 14 Şa‘bân sene 1185. Şuhûdü’l-hâl: el-Hâc Mustafa b. Hasan, Osman b. Hamza, Ali Çelebi b. Abdullah, İsmail Çelebi b. Ali, Muhzırân Kethudâsı Mehmed Ağa.