İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 290 Hüküm no: 256 Orijinal metin no: [85b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehzâdebaşı’nda kapamacı olan Matos ile Vartan’ın arasındaki anlaşmazlığın giderildiği Mahmiye-i İstanbul’da Şehzâdebaşı nâm mahâlde kapamacı olan Matos v. Sahak nâm zimmî meclis-i şer‘-i şerîf-i enverde işbu hâmilü’r-rakīm Vartan v. Norsiz nâm zimmî muvâcehesinde üzerine da‘vâ ve takrîr-i kelâm edip benim işbu hazır bi’l-meclis Ohannes v. Ağya nâm zimmî zimmetinde cihet-i karzdan üç yüz guruş hakkım olup ben diyâr-ı âhara gidip merkūm Vartan’ı tarafımdan vekîl etmeksizin merkūm Vartan zevcem Nonya b. Manuk nâm Nasrâniye tarafından vekîlim deyü fuzûlî merkūm Ohannes ile iki yüz seksen guruş kıymetli elli yedi aded esvâb-ı ma‘lûme üzerine sulh olup zikrolunan elli yedi aded esvâbı kabz ve bana vermekle hâlâ merkūm Vartan’dan taleb ederim deyü da‘vâya tesâddî eylediğimde ol dahi ber-vech-i muharrer ol mikdâr esvâb kabzını ikrâr ve sana teslîm eyledim deyü kat‘â tesâddî birle beynimizde münâza‘ât-ı kesîre cereyân etmiş idi el-hâletü hâzihî beynimize muslihûn tavassut edip beni da‘vâ-yı mezkûremden yüz guruş üzerine merkūm Vartan ile inşâ-i akd-i sulh eylediklerinden ben dahi sulh-ı mezkûru kabûl ve bedel-i sulh-ı mezkûr yüz guruşu merkūm Vartan bana def‘ ve teslîm ben dahi yedinden bi’t-tamam ahz u kabz eylediğimden sonra mâ‘adâya ve bi’l-cümle husûs-ı mezkûra müte‘allika-i âmme-i da‘vâdan merkūm Vartan ile Ohannes’in zimmetlerini ibrâ ve ıskāt eylediğimde merkūm Vartan dahi bana medfû‘u olan meblağ-ı mezkûr yüz guruşa ve merkūm Ohannes dahi husûs-ı mezkûra müte‘allika-i âmme-i da‘vâdan benim zimmetimi ibrâ ve ıskāt edip ve herbirimiz ber-vech-i muharrer âharın ibrâsını kabûl eyledik dedikde gıbbe’t-tasdîkı’ş-şer‘î mâ vaka‘a [bi’t-taleb ketb olundu.] Fî 20 Ramazan sene 1185. Şuhûdü’l-hâl: el-Hâc [Mustafa] b. Hasan, Osman b. Hamza, Ali b. Abdullah, İsmail b. Ali, Muhzırân Kethudâsı Mehmed Ağa, Sahar v. Yani, Sarrâf Kirkor v. Bogos, Sarrâf v. Aleksan v. Kapril, Keresteci Vartan v. Bogos.