İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 291 Hüküm no: 257 Orijinal metin no: [85b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fırıncı Musyo’nun Avratpazarı’nda bulunan değirmendeki gedik hissesini kızı Kito’ya sattığı Habbâz tâifesinden Musyo v. Boyko nâm zimmî meclis-i şer‘-i şerîf-i enverde sulbiye kebîre kızı hâmiletü hâzihi’l-vesîka Kito nâm Nasrâniye tarafından husûs-ı âti’z-zikrde tasdîka vekîl-i sâbitü’l-vekâlesi olan Pepo v. Palo nâm zimmî muvâcehesinde ikrâr-ı tâm ve takrîr-i kelâm edip mahmiye-i İstanbul’da Avratpazarı kurbünde Sultân Çolak Fırını demekle ma‘rûf bir bâb [86a] fırın ittisâlinde vâki‘ altı horos değirmen derûnunda mevcûd gedik ta‘bîr olunur yirmi dört re’s bargir ve sâir âlât-ı lâzıme-i ma‘lûme yirmi dört sehim i‘tibâriyle altı sehim hisse-i şâyi‘ası akd-i âti’z-zikrin sudûruna değin yedimde mülk ve hakkım olmağla hâlâ ben mârrü’z-zikr altı sehim hisse-i şâyi‘amı tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile kızım müvekkile-i merkūme Kito Nasrâniye’ye bin guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr bin guruşu kızım müvekkile-i mezbûre yedinden tamamen ahz u kabz eyleyip semenine bey‘-i mezkûrun tağrîr ve gabnine ve gedik husûsuna müte‘allika-i âmme-i da‘vâdan kızım müvekkile-i merkūmenin zimmetini ibrâ ve ıskāt edip ol dahi ibrâmı kabûl eyledi fîmâ-ba‘d mârrü’z-zikr fırın ve değirmen derûnunda mevcûd gedik ta‘bîr olunur yirmi dört re’s bargir ve sâir âlât-ı lâzıme-i ma‘lûmede yirmi dört sehim i‘tibâriyle altı sehim hisse-i şâyi‘am kızım müvekkile-i merkūme Kito Nasrâniye’nin mülk-i müşterâsı ve hakk-ı sırfı olup benim kat‘â alâka ve medhalim kalmamışdır dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 10 Şevval sene 1185. Şuhûdü’l-hâl: Muhzırân Kethudâsı Mehmed Ağa, Seyyid el-Hâc Ebûbekir b. el-Hâc Mehmed, Molla Mustafa b. Mehmed, Ahmed Ağa b. Hüseyin, Ekmekçiler Kethudâsı Ali, Markos v. Semail, Mikayil v. İstepan, Ahram v. Kazer, Avanis v. Markar, Artin v. Tomas Temme bi-avnillâhi te‘âlâ El-emru hasbemâ zükire fîhî Nemakahü’l-fakīru ileyhi azze şânuhû Ali el-kādî bi-Dârü’s-saltanati’l-aliyye -Gufire leh-