İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 292 Hüküm no: 258 Orijinal metin no: [86a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mısırlı Hüseyin Ağa’nın alacak hususunda Mehmed Hamdi ile sulh olup birbirlerinin zimmetlerini ibra ettikleri Medîne-i Üsküdar’da Eski Vâlide Câmi‘-i şerîfi civârında Çinili Câmi‘i kurbünde sâkin Mısırlı el-Hâc Hüseyin Ağa b. el-Hâc Ahmed tarafından husûs-ı âti’l-beyânda vekîl olduğu Ahmed Efendi b. Halil ve Ali Ağa b. Mehmed nâm kimesneler şehâdetleriyle sâbit olan Hâfız Mehmed Efendi b. Ali meclis-i şer‘-i şerîf-i enverde işbu bâ‘isü’l-vesîka el-Hâc Mehmed Hamdi b. İbrahim mahzarında Süleyman hazır olduğu hâlde bi’l-vekâle ikrâr-ı tâm ve takrîr-i kelâm edip yedimde olan bin yüz yetmiş altı senesi Recebi’l-ferdi gurresi târihiyle müverrah işbu bir kıt‘a temessük mantûkunca müvekkilim mezbûrun mâlından hâzır-ı mezbûr Süleyman Ağa yediyle mezbûr el-Hâc Mehmed Hamdi istikrâz ve kabz eylediği iki bin sekiz yüz doksan sekiz guruş mezbûr el-Hâc Mehmed Hamdi zimmetinde hakkı olmağla hâlâ bi’l-vekâle taleb ederim deyü da‘vâ ol dahi cevâbında mikdâr-ı mezkûr meblağ ahzını ikrâr lâkin Ahıska Ağası Hallı Ahmed Ağa nâm kimesneye Ahıska ağalığı alıvermek için iktizâ eden mahallere câize olmak üzere vermiş idim deyü kendinin iktirâzını inkâr birle beynimizde münâza‘ât-ı [86b] kesîre cereyân etmiş idi el-hâletü hâzihî beynimize muslihûn tavassut edip bi’l-vekâle tesâddî eylediğim da‘vâ-yı mezkûremden beni merkūm el-Hâc Mehmed Hamdi ile beş yüz guruş üzerine sulh eyledikden sonra ben dahi sulh-ı merkūmu bi’l-vekâle kabûl ve bedel-i sulh-ı merkūm beş yüz guruşu edâya tenbîh olunup meblağ-ı merkūm beş yüz guruşdan mâ‘adâ husûs-ı mezbûre ve târih-i kitâba gelince beynlerinde cereyân eden bi’l-cümle hukūk-ı sâireye müte‘allika-i âmme-i de‘âvî ve kâffe-i mutâlebâtdan bi’l-vekâle merkūm el-Hâc Mehmed Hamdi’nin zimmetini ibrâ-i âmm-ı sahîh-i şer‘î ile ibrâ ve ıskāt etdikden sonra mezbûr Süleyman Ağa dahi kezâlik husûs-ı mezbûre ve hukūk-ı sâireye müte‘allika-i âmme-i da‘vâdan merkūm el-Hâc Mehmed Hamdi’nin zimmetini ibrâ ve ıskāt etdikde merkūm el-Hâc Mehmed Hamdi dahi ibrâ-i mezkûru kabûl etdi dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis ve’l-işrîn min-Şevvali’l-mükerrem sene hamse ve semânîn ve mie ve elf. Şuhûdü’l-hâl: Ahmed Efendi b. Halil, Arabzâde Mehmed b. el-Hâc Mehmed, Muhzır İsmail, Kethudâ-yı Muhzırân Mehmed Ağa, es-Seyyid Halil Ağa b. es-Seyyid Ahmed. [86b-91a] [Boş sayfalar]