İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 293 Hüküm no: 260 Orijinal metin no: [91b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Moskof seferi için İstanbul’dan kırk adet sirem arabası temin edilip nevruzdan önce orduya teslim edilmesine dair fermân sureti Akzâ kuzâtü’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘u a‘lâmi’ş-şerî‘âti ve’d-dîn vârisü ulûmü’l-enbiyâ’i ve’l-mürselîn el-muhtassu bi-mezîd-i inâyeti’l-meliki’l-mu‘în mevlânâ İstanbul kādısı -zîdet fezâilühû- iftihârü’l-emâcid ve’l-ekârim câmi‘u’l-mehâmidi ve’l-mekârim el-muhtassu bi-mezîdi’l-meliki’d-dâim dergâh-ı mu‘allâm yeniçerileri ağası vekîli olan Sekbânbaşı Mustafa -dâme mecduhû- tevkī‘-i refî‘-i hümâyûn vâsıl olucak ma‘lûm ola ki dîn ü devlet-i aliyyeme sû’-i kasdıyla hücûm üzere olan Moskov keferesinin kahr u tedmîr ve şerr u fesâd[dan] bilâd ve kurâ[yı] tanzîf ve tathîr zımnında avn-i inâyet-i hazret-i rabbü’l-müste‘ân ile evvel-bahâr-ı huceste-âsârda tedârükât-ı kaviyye ile üzerlerine varılmak için kemâfî’s-sâbık iktizâ eden hidemâtda istihdâm olunmak üzere şimdiden müstevfî sirem arabaları tedârük ve ihrâcı mühim ve muktezî olduğuna binâen siz ki kādı ve sekbânbaşı-i mûmâ-ileyhimâsız sâbıkı mûcebince yüke girdikleri günden îcâb eden ücretleri ordu-yı hümâyûnumda arabacıbaşı yedinden verilmek şartıyla Âsitâne-i sa‘âdetimden kırk kıt‘a arabaları ihrâc ve nevrûz-ı fîrûzdan mukaddem ordu-yı hümâyûnumda mevcûd ettirilmek fermânım olmağın imdi zikrolunan arabaların bargirleri güçlü ve kuvvetli ve metîn ve müstahkem ve herbiri araba üçer bargirli olmak şartıyla intihâb olunarak tamamen ve kâmilen alâ-eyyi hâlin ihrâc ettirilmek üzere işbu emr-i âlîşânım ısdâr ve dergâh-ı mu‘allâm gediklilerinden Nazifi Mustafa -zîde mecduhû- mübâşeretiyle irsâl kılınmışdır imdi vusûlünde kat‘â te’hîr ve tevakkufa ruhsat ve cevâz göstermeksizin mârrü’z-zikrol mikdâr kıt‘a araba sirem arabaları Başmuhâsebe’den ihrâc ve irsâl olunan memhûr ve mümzâ sûret-i defter mûcebince bir kıt‘ası geri kalmamak şürût-ı mezkûre mûcebince cümlesi ber-vech-i tekmîl tedârük ve ihrâc ve vakt-i mezbûrdan mukaddem ordu-yı hümâyûnumda mevcûd ettirilmeğe mezîd-i takayyüd ve ihtimâm-ı tâm eyleyip şöyleki ma‘âza’llâhu te‘âlâ matlûb olan arabaları tedârük ve tanzîm ve mevcûd ettirilmekde arabacı tâifesi tekâsül ve iğmâz ederler ise zâbitleri ma‘rifetiyle tertîb-i cezâ ile mücâzât olunacakları kendilere tefhîm ve nizâmını ucâleten hüsn-i sûrete ifrâğ ve mahâlline kayd için arz ve i‘lâma ihtimâm-ı azîm eylemeniz bâbında fermân-ı âlîşânım sâdır olmuşdur buyurdum ki hükm-i şerîfimle ( ) vardıkda bu bâbda vech-i meşrûh üzere şeref-yâfte-i sudûr olan işbu emr-i celîlü’ş-şân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla âmil olup hilâfıyla vaz‘ u hareketden tehâşî ve mücânebet eyleyesiz, şöyle bilesiz, alâmet-i şerîfime i‘timâd kılasız. Tahrîren fi’l-yevmi’l-hâdî aşer min-şehri Cemâziyelâhir li-sene erba‘a ve semânîn ve mie elf. Be-yurd-ı Sahrâ-yı İsakcı