İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 294 Hüküm no: 261 Orijinal metin no: [92a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tedavüldeki altın paraların kaç kuruşa alınıp satılacağı hakkında fermân sureti Bâ-sahh İstanbul kādısı fazîletli efendi Hâlâ der-bâr-ı adâlet-medâr-ı hüsrevânede sikke-i hümâyûn-ı sa‘âdet-makrûnda meskûk ve el-yevm yüz on paraya alınıp verilen zer-i mahbûb ve yüz elli beş paraya olan fındık altını bazı nâkısü’l-ayâr altın işlenen mahallere ve husûsan Mısr-ı Kāhire cânibine nakl ve izâbe ile menâfi‘ hâsıl olmağın eyâdî-i nâsda bulunan İstanbul zer-i mahbûb ve fındıkīsi bazı tama‘kârân celb ve cem‘ ve ticâret ümniyesiyle ol havâlîye nakl ve bu fi‘il-i münker memâlik-i mahrûsede sikke-i hasene-i hüsrevânenin fikdânına ve nâkısü’l-ayâr altının vecdânına ve te‘âmül-i nâsın inkıtâ‘ına sebeb ve illet olduğu derece-i tahkīka resîde olmağın bu mazarrâtın indifâ‘ı ve sikke-i hümâyûnun memâlik-i mahrûsede istikrârıyla tarîka-i iktisâda ri‘âyet ve icâbet umûrdan olmağla Âsitâne-i aliyye darbhânesinde meskûk olan zer-i mahbûb-i İstanbûlî üç guruşa ve kezâlik İstanbul fındık altını dört guruşa râyic olup ancak Mısır cânibinde kat‘ olunan ekser nâkısü’l-vezn ve’l-ayâr olduğundan başka eyâdî-i nâsda bulunan İstanbul altınlarını peyder pey ahz ve ihtilâsla izâbe edegelmeleriyle bu i‘tibâr Mısır altınlarında cârî olmayıp kemâ-kân Mısır zer-i mahbûb ve zincirlisi yüz on paraya ve Mısır fındıklısı yüz elli beş paraya dâd u sited olunmak bâbında emr-i hümâyûn-ı şevket-makrûn şeref-rîz-i sudûr olmağla imdi fîmâ-ba‘d Mısır altınlarından mâ‘adâ İstanbul zer-i mahbûbu üç guruşa ve İstanbul fındık altını dört guruşa alınıp verilip ziyâde ve noksan alınmamak husûsunu bezzâzistân-ı cedîd ve atîk ve esnâf kethudâlarına ve sarrâflara ve sâir tenbîhi lâzım gelenlere tenbîh ve hilâfına hareketden tahzîr-i şedîd eyleyesin deyü buyruldu. Fî 17 L sene [1]184.