İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 295 Hüküm no: 262 Orijinal metin no: [92a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Babadağı kışlasındaki ordu için ekmekçi ustaları bulunması ve bu ustalara verilecek ücrete dair fermân sureti Düstûr-ı mükerrem müşîr-i müfahham nizâmü’l-âlem müdebbiru umûri’l-cumhûr bi’l-fikri’s-sâkıb mütemmimü mehâmmü’l-enâm bi’r-re’yi’s-sâib mümehhidü bünyânü’d-devle ve’l-ikbâl ve müşeyyidü erkâni’s-sa‘âdeti ve’l-iclâl el-mahfûf bi-sunûf-i avâtıfi’l-meliki’l-a‘lâ rikâb-ı hümâyûnum kāimmakāmı vezîr ( ) Paşa -edâmallâhu te‘âlâ iclâlehû- ve akzâ kuzâtü’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘u a‘lâmi’ş-şerî‘âti ve’d-dîn vârisü ulûmü’l-enbiyâ’i ve’l-mürselîn el-muhtassu bi-mezîd-i inâyeti’l-meliki’l-mu‘în mevlânâ İstanbul kādısı -zîdet fezâilühû- ve iftihârü’l-ümerâi ve’l-ekâbir müctemi‘u cemî‘-i’l-me‘ânî ve’l-mefâhir el-muhtassu bi-mezîd-i inâyeti’l-meliki’l-kādir rikâb-ı hümâyûnum defterdârı ( ) -dâme ulüvvuhû- ve mefâhirü’l-emâsil-i ve’l-akrân ekmekçiler kethudâsı ve yiğitbaşısı ve nizâm ustaları -zîde kadrühum- tevkī‘-i refî‘-i hümâyûn vâsıl olucak ma‘lûm ola ki bi-tevfîkıhî sübhânehû ve te‘âlâ evvel-bahâr-ı huceste-âsârda Moskov keferesinden ahz-ı sâr ve intikām için Babadağı meştâsından hareketde tecemmu‘ ve ihtişâd edecek tavâyif-i askeriyenin rûz-merre verilecek nân ta‘yînâtlarını ber-vefk-i me’mûl tabh ve tekmîl ettirilmek üzere iş‘âr-ı sâbıkada de’b ve mu‘tâd olduğu vechile nüzûl emîni ma‘rifetiyle gerek serdâr-ı ekrem dâiresi ve gerek ocaklarım ve ahâlî-i dîvân ta‘yînâtlarına müstevfâ fırın ve hıyâm ve amele ve mühimmâtın vaktiyle tertîb ve tanzîm mühim ve muktezî olup geçen sene Ramazan-ı şerîf hilâlinde Babadağı meştâsına mülâzım olan habbâzânın sûret-i hâllerine göre tertîb olunan otuz aded hıyâm ve usta ve amelesi cümleten Âsitâne-i sa‘âdetimden matlûb olup ol bâbda sâdır olan emr-i âlîşânımda mastûr şürût ve kuyûdun [92b] icrâsı zımnında mevlânâ-yı mûmâ-ileyh ma‘rifetiyle tanzîmi esnâsında ekmekçiler kethudâsı ve yiğitbaşı ve nizâm ustaları ittifâklarıyla iktizâ eden gönüllü ve mu‘teber habbâz ustalarından li-maslahatin sarf-ı enzârlarıyla ibtidâsına cebeciler ocağına ekmekçibaşı olup sû’-i tavrından nâşî firâr eden el-Hâc Ömer nâm kimesneyi cümle ittifâklarıyla ekmekçibaşı nasb ve mîrîden aldığı mühimmât-bahâyı ekl ü bel‘ için bazı müflis makūlelerini istishâb birle Babadağı’na vürûdlarında hilâf-ı mu‘tâd nice mutâlebât ve nizâ‘a mutesâddî ve Babadağı meştâsında mevcûd olanların tekrar tertîb ve istihdâmlarına mebâliğ-i vâfire sarfına sebeb ve bâdî olduğundan gayrı ta‘yînât için aldığı mîrî dakīki hufyeten füruht töhmeti ile ahz u habs esnâda hesâbı rü’yet olunmaksızın firâr ve ekser rüfekāsı kendiye kafadar olduğundan zarûrî Babadağı meştâsında mevcûd habbâzânın istihdâmlarına muhtâc olmağla ba‘de-ezîn sene-i cedîde için ekmekçi tertîbinde gerek umûr-ı mezkûrenin ber-vech-i matlûb idâresi ve gerek mîrînin izâ‘atden sıyâneti husûsu erbâbıyla lede’l-müzâkere el-yevm müstahdem ve mücerreb olan ekmekçi ustalarından kendi kefâletleriyle intihâb olunarak meştâda mevcûd ve tertîb olunan Ser-habbâz Agop ve Serkiz ve Bedros ve Arakil ve Sağır Esper ve Vartan ve Mardiros ve diğer Serkiz nâm on nefer ekmekçiler nasb ve tahsîs kılınıp mâ‘adâ tekmîli lâzım için Âsitâne-i aliyyemden ihrâc iktizâ edip tertîb olunan Ayazmalı Serkiz ve Müftü Hammâmı ustası ve Kör Markar ve Pilavoğlu ve Darbhâneli Altınoğlu ve Mirahur ustası ve Tavukpazarlı Serkiz ve Galata Tekkesi önünde Avanis ve Beşiktaşlı Kalyoz ve Şişehâne fırınında Arakil ve Lanka Yenikapısı’nda Agop ve Nişâncılı Zakar ve Balatlı Mikel ve Üsküdarlı Makdisioğlu’nun ve Üsküdar’da Kebabçılar fırınında Mıgırdıç nâm on beş nefer ustaları Âsitâne-i sa‘âdetimde kāimmakām-ı müşârün-ileyhin emir ve tenbîhi ve İstanbul kādısı ve rikâb-ı hümâyûnum defterdârı mûmâ-ileyhin ma‘rifet ve ihtimâmları ve kethudâ ve yiğitbaşı ve nizâm ustaları ittifâklarıyla ma‘lûm ve mu‘temedleri olduğuna binâen intihâb edip birer takrîb ile yerlerine bezl-i irsâl olunmayıp bi’n-nefs kendileri tutmak üzere me’mûr kılınıp gerek onların ve gerek meştâsında olanların tertîb olunduğu üzere mühimmât ve ameleleri tanzîm ve içlerinden bir neferi firâr ve gaybet ederi olur ise cânib-i mîrîden verilen meblağ kendilerinden veyâhûd kefîllerinden tahsîl ve tazmîn olunmak şartıyla kavî kefîlleri ahz ve nizâma rabt olundukdan sonra yalnız mühimmât-bahâları rikâb-ı hümâyûnum hazînesinden i‘tâ ve mükemmelen vakt ü zamanıyla ordu-yı hümâyûnuma irsâl ve îsâl olunmalarını Nüzûl Emîni el-Hâc Süleyman -zîde mecduhû- takrîr birle inhâ ve istid‘â etmeğin sene-i sâbıkada otuz aded hıyâmın tanzîmi için rikâb-hümâyûnum hazînesinden yirmi yedi bin guruş verilmesi fermânım olup sene-i cedîde için meştâ-yı hümâyûnumda mevcûd habbâzândan tahrîrine nizâm verilen on çadırın levâzımı Âsitâne-i sa‘âdetimden tedârük ve tanzîm için mühimmât bahâları on altı bin guruş ve tabhiyelerine mahsûben verilecek üç bin guruş ol cânibde kabzına me’mûra teslîm ve mâ‘adâ vech-i muharrer üzere Âsitâne-i sa‘âdetimde tanzîmi iktizâ eden on beş aded hıyâmın dahi herbiri üçer fırın i‘tibâr ve her fırın dörder nefer işçi tedârük olunmak üzere her fırın mîrîden veriligelen ikişer yüz guruş mühimmât bahâ ve li-ecli’l-i‘âne ücret-i tabhiyelerine mahsûben dahi yüzer guruş ki cem‘an on üç bin beş yüz [93a] guruş kezâlik esnâf-ı mezkûreye verilip tanzîmlerine ikdâm olunmak üzere min-haysü’l-mecmû‘ yirmi iki bin beş yüz guruş matlûbları iktizâ eylediği mevkūfâtdan tertîb ve hesâb olunmağla mûcebince mevkūfâta kaydolunup kāimesi ve sûret ve emr-i şerîfim verilmek bâbında iftihârü’l-ümerâi ve’l-ekâbir müctemi‘u cemî‘i’l-me‘âlî ve’l-mefâhir bi’l-fî‘l başdefterdârım İsmet Ali -dâme ulüvvuhû- telhîs mûcebince mahâlline kayd ve sûret ve kāimesi verilmekle vech-i meşrûh üzere amel olunmak bâbında fermân-ı âlîşân sâdır olmuşdur. Buyurdum ki hükm-i şerîfim vardıkda bu bâbda sâdır olan emrim üzere amel edip dahi siz ki kāimmakām-ı müşâr ve mevlânâ ve defterdâr-ı mûmâ-ileyhimsiz vech-i meşrûh üzere el-yevm bu tarafda mevcûd ve gerek ol tarafda tanzîm olunacak ol mikdâr hıyâmın matlûbları olan meblağ-ı mezbûr yirmi iki bin beş yüz guruş rikâb-ı hümâyûnum hazînesinden ifrâz ve meştâ-yı hümâyûnumda mevcûd habbâzândan tahrîrine nizâm verilen on aded çadırın sülemî tedârüki için iktizâ eden altı bin guruş taraflarından ol cânibde me’mûra teslîm ve Âsitâne-i sa‘âdetimden tahrîr ve tanzîm olunacak on beş çadırın mühimmât-bahâ ve tabhıyelerine mahsûben îcâb eden on üç bin beş yüz guruş dahi esnâf-ı mezkûreye i‘tâ ve meştâ-yı hümâyûnumda tahrîr olunacakların tabhıyelerine mahsûben kusûr-ı matlûbları iktizâ eden üç bin guruş mübâşiretlerinde tevzî‘ olunmak üzere ma‘an irsâl ve fermânım olduğu vechile tahrîr ve tanzîmi matlûb olan mezkûru’l-esâmî ustaların mükemmel hıyâm ve aşçılarıyla tedârük ve nizâm-ı kaviyyeye bend olunarak temşiyet ve tanzîm ve vaktiyle ordu-yı hümâyûnuma îsâle bezle cell-i himmet ve sarf-ı küll-i miknet eyleyesiz ve sen [siz] ki kethudâ ve yiğitbaşı ve nizâm ustalarısız ber-vech-i muharrer mazmûn-ı emr-i şerîfimle amel ve hareket ve hilâfından hazer ve mübâ‘adet eyleyesiz, şöyle bilesiz, alâmet-i şerîfe i‘timâd kılasız. Tahrîren fi’l-yevmi’s-sâmin aşer min-Şevvali’l-mükerrem li-sene erba‘a ve semânîn ve mie ve elf. Be-meştâ-yı Babadağı