İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 297 Hüküm no: 263 Orijinal metin no: [93a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefere çıkacak ordu için İstanbul’daki yirmi sekiz hirfet esnafından ihrac olunacak seksen beş adet haymenin nevruzdan önce Babadağı Kışlası’nda hazır edilmesine dair fermân sureti Akzâ kuzâtü’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘u a‘lâmi’ş-şerî‘âti ve’d-dîn vârisü ulûmü’l-enbiyâ’i ve’l-mürselîn el-muhtassu bi-mezîd-i inâyeti’l-meliki’l-mu‘în mevlânâ İstanbul kādısı -zîdet fezâilühû- iftihârü’l-emâsil ve’l-ekârim câmi‘u’l-mehâmid ve’l-mekârim el-muhtassu bi-mezîd-i inâyeti’l-meliki’d-dâim rikâb-ı hümâyûnumda bi’l-fi‘il sekbânbaşı olan ( ) -dâme mecduhû- mefâhirü’l-emâsil ve’l-akrân ordu ağası ( ) ve esnâf kethudâları ve ihtiyârları ve üstâdları -zîde kadrühum- tevkī‘-i refî‘-i hümâyûn vâsıl olucak ma‘lûm ola ki ordu-yı hümâyûnumda asâkir-i muvahhidînin iktizâ eden malzemeleri tedârükünde zarûret ve müzâyaka çekilmemek için ordu-yı hümâyûnumda mevcûd bulunmak üzere hirfet esnâfının sinîn-i sâbıkada olageldiği vechile bilâd-ı selâseden aynı orduları ihrâca ve sâir bilâddan dahi bedelleri tahsîl olunugeldiğine binâen işbu sene-i mübârekede dahi meştâ-yı hümâyûnumda mevcûd bulunanları için mevkūfâtdan ihrâc olunan mümzâ sûret-i defter mûcebince İstanbul’da vâki‘ yirmi sekiz hırfetin seksen beş aded haymeleri olmak üzere orduları ihrâcı tertîb ve tanzîm olunmak bâbında bundan akdem emr-i âlîşânım ısdâr ve ordu ağasının âdemiyle irsâl olunmağla te’kîden ve isti‘câlen bu def‘a işbu emr-i âlîşânım ısdâr ve irsâl [93b] olunmağla imdi vusûlünde sen ki mevlâ[nâ] ve sekbânbaşı mûmâ-ileyhimâ ve sâirlerisiz zikrolunan yirmi sekiz hirfetin mu‘tâd-ı kadîm üzere iktizâ eden masrafları beynlerinde mer‘î topuldan [tutulup] yamaklarının birbirlerine imdâd ve i‘ânetleri gördürülüp tamamen ol mikdâr haymeleri ihrâc ve inşâallâhu te‘âlâ nevrûz-ı fîrûzdan mukaddem Babadağı meştâsında mevcûd ve âmâde etdirmeğe bezl ü sa‘y ve ihtirâz ve avk ve te’hîrden ve ihmâl ve müsâmaha misillü vaz‘ u hareketden mücânebet olunmak bâbında fermân-ı âlîşânım sâdır olmuşdur buyurdum ki hükm-i şerîfim ( ) vardıkda bu bâbda vech-i meşrûh üzere şeref-yâfte-i sudûr olan işbu emr-i şerîf-i celîlü’ş-şân-ı vâcibü’l-imtisâl lâzımü’l-ittibâ‘ımın mazmûn-ı itâ‘at-makrûnuyla âmil olup hilâfıyla vaz‘ u hareketden be-gāyet ihtirâz ve icâbet [mücânebet] eyleyesiz, şöyle bilesiz, alâmet-i şerîfeye i‘timâd kılasız. Tahrîren fi’l-yevmi’s-sâdis [ve] işrîn min-şehri Şevvali’l-mükerrem li-sene erba‘a ve semânîn ve mie ve elf. Be-meştâ-yı Babadağı