İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 298 Hüküm no: 264 Orijinal metin no: [93b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Efisto’nun ölen Todos’ta olan alacağını ödemesi için vârisi Bahçıvan Kosta aleyhine açtığı davada on yedi kuruşa sulh olduğu Mahmiye-i İstanbul’da Yenibahçe’de bağçevân tâifesinden olup bundan akdem hâlik [olan] Todos v. Dimo nâm zimmînin verâseti li-ebeveyn er karındaşı Bağçevân Kosta nâm zimmîye ale’l-[in]hisâr tahakkukundan sonra bağçevân tâifesinden Efisto v. Hristo nâm zimmî meclis-i şer‘-i lâzımü’t-tevkīrde hâlik-i merkūmun karındaşı bâ‘isü’s-sifr Kosta muvâcehesinde ikrâr-ı tâm ve takrîr-i kelâm edip benim merkūm Kosta’nın karındaşı hâlik-i mesfûr Todos zimmetinde cihet-i karzdan otuz üç guruş kırk akçe hakkım olup meblağ-ı mezbûr otuz üç guruş kırk akçe kable’l-ahz ve’l-isti‘fâ merkūm Todos hâlik ve terekesine karındaşı merkūm Kosta bi’l-verâse vaz‘-ı yed olmağla ben bundan akdem meblağ-ı mezbûru karındaş-ı mesfûr Kosta’dan taleb [ve] da‘vâ sadedinde olduğumla bi’l-külliye inkâr edip ol vechile beynimizde münâza‘ât-ı kesîre ve muhâsamât-ı ekîde vâki‘ olmuş idi el-hâletü hâzihî beynimize faslı için tavassut edip da‘vâ-yı mezkûremden beni mesfûr Kosta ile an-inkârin on yedi guruş üzerine inşâ-i akd-i sulh eylediklerinden ben dahi bedel-i sulh-ı mezkûr on yedi guruşu mesfûr Kosta yedinden tamamen ahz u kabz edip mâ‘adâsını ve husûs-ı mezkûra ve sâir müte‘allika-i âmme-i da‘vâdan merkūm Kosta’nın zimmetini ibrâ ve ıskāt eylediğimde ol dahi bana medfû‘u olan bedel-i sulh-ı mezkûr on yedi guruşa ve sâire müte‘allika âmme-i da‘vâdan benim zimmetimi ibrâ ve ıskāt ve herbirimiz âharın ibrâsını kabûl eyledik dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sâdis aşer min-şehri Rebî‘i’l-evvel li-sene hamse ve semânîn ve mie ve elf. Şuhûdü’l-hâl: Du‘âcı Eyüb b. Ali, Osman Ağa b. Hamza, Uzun Hüseyin b. Süleyman, Manav Mustafa b. Ahmed, Mustafa b. Ahmed, Ali b. Abdullah ve gayruhum. Panayot v. Kosta, Toto v. Masiko, Nikola v. Petro, Yuvan v. Kostantin, Petro v. Dimo.