İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 54 Hüküm no: 9 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Büyük Ayasofya’daki Lala Hayreddin Bey Camii Vakfı’na ait arsanın Silahdar Mehmed Ağa b. Ali Ağa’ya kiralandığına ve bedelinin vakıf işlerine harcandığına dair istihkâm kaydı İstihkâm İstanbul kādısı efendiler hazerâtı nezâretlerinde olan evkāfdan olup mahmiye-i İstanbul’da Ayasofya-i kebîr kurbünde Lala Hayreddîn Bey Mahallesi’nde kâin Lala Hayreddîn Bey merhûmun binâ eylediği câmi‘-i şerîfi vakfının evlâdiyet ve meşrûtiyet üzere hâlâ mütevellîsi olan es-Seyyid Numan Bey b. Abdülkadir Paşa meclis-i şer‘-i hatîr-i lâzımü’t-tevkīrde, hâlâ Silâhdâr-ı hazret-i şehriyârî umdetü’l-ekârim ve’l-e‘âlî menba‘u’l-mekârim ve’l-me‘âlî râfi‘-i hâze’l-kitâbi’l-müstetâb devletlü inâyetlü sa‘âdetlü es-Seyyid Mehmed Ağa b. Ali Ağa hazretleri cânib-i devletlerinden zikri âtî husûsu tasdîka vekîl buyurdukları mefharu’l-emâsil ve’l-akrân Hâfız Mustafa Efendi b. el-Hâc Osman mahzarında ikrâr-ı tâm ve takrîr-i kelâm edip mütevellîsi olduğum vakf-ı mezbûrdan olup mahalle-i merkūmede vâki‘ bir tarafdan yine vakf-ı mezbûrdan müvekkil-i müşârün-ileyh hazretlerinin taht-ı tasarruflarında olan menzil ve bir tarafdan âhar vakıfdan yine müvekkil-i müşârün-ileyh hazretlerinin tasarruflarında olan menzil ve bir tarafdan arsa-i hâliye ve bir tarafdan zikrolunan Lala Hayreddîn Bey Câmi‘-i şerîfi ile mahdûd tûlen ve arzen bi-hisâb-ı terbî‘î yüz seksen zirâ‘ müfrez-i vakf arsayı müvekkil-i müşârün-ileyh hazretlerine verdiğim işbu bir kıt‘a mümzâ ve mahtûm mütevellî temessükü nâtık olduğu vech üzere beş yüz kırk guruşa icâre-i mu‘accele ve yevmî bir akçe icâre-i müeccele mümâsili ile taraf-ı vakfdan bi’t-tevliye müvekkil-i müşârün-ileyh hazretlerine îcâr ve teslîm eylediğimde, müvekkil-i müşârün-ileyh hazretleri dahi istîcâr ve tesellüm ve kabûl ve mu‘accele-i mersûm beş yüz kırk guruşu bana def‘ ü teslîm buyurduklarında, ben-dahi tamamen tesellüm ve ahz ü kabz ve umûr-ı vakf-ı mezbûra sırfla istihlâk eylediğimden sonra meblağ-ı müstehleke-i merkūmeye müte‘allika da‘vâdan taraf-ı vakf-ı mezbûru ve benim zimmetimi ibrâ ve ıskāt buyurduklarında, ben-dahi ibrâ-i mezkûru kabûl eyledim. Ba‘de’l-yevm arsa-i mahdûde-i mezkûre müvekkil-i müşârün-ileyh hazretlerinin bi’l-icâreteyn dâhil-i havza-i tasarrufları olmuşdur dedikde vekîl-i mûmâ-ileyh Hâfız Mustafa Efendi dahi mütevellî-i merkūmu tahkīk ve tasdîk etmeğin li-ecli’l-istihkâm işbu vesîka-i enîka alâ-mâ-hüve’l-hakīka bi’t-taleb ketb olundu. Fî 17 Ra sene [1]193. Şuhûdü’l-hâl: İbrahim Ağa Silâhşör-i Hâssa, Ömer Ağa Silâhşör-i Hâssa, Hasan Ağa Silâhşör-ı Hâssa, İbrahim Ağa Gediklüyân-ı Dergâh-ı âlî, [3a] Mühürdâr Mehmed Efendi tâbi‘-i Tevkī‘î Paşa, Osman Efendi, İmâm Mehmed Efendi, Lâleli Hatîbi Karakulak Mehmed Efendi, Hüseyin Ağa, Ahmed Efendi, Hâsahu[r]lı Mehmed Ağa, Yeğen İbrahim Çavuş Ağa, Kadı Süleyman Efendi.