İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 55 Hüküm no: 10 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul hallaçlar esnafının kethudalığına Mehmed Usta b. Ali’nin tayin edildiği Kethudâ-yı hallâcân İstanbul’da vâki‘ hallâclar esnâfının yiğitbaşıları Hasan Usta ve ihtiyâr ustalarından Mehmed ve Salih ve Abdullah ve Mustafa ve diğer Mustafa ve el-Hâc Hüseyin ve Hasan ve Hâfız es-Seyyid İbrahim ve es-Seyyid Molla Sâdık ve Ali ve Osman Odabaşı ve Ahmed ve Süleyman Odabaşı ve Ömer ve es-Seyyid İsmail ve Mustafa Odabaşı ve Mehmed ve diğer Mehmed ve Mehmed Usta nâm kimesneler ile zimmî ustalarından Lefter ve Todori ve Paskal ve Kostandi ve Panayot ve diğer Kostandi ve Panayot ve diğer Kostandi ve diğer Lefter ve Dimitri ve Yani ve Yorgi ve Hris meclis-i şer‘-i şerîf-i enverde takrîr-i kelâm ve ta‘bîr ani’l-merâm edip hâlâ kethudâmız olan Hâfız Mehmed Usta b. Mehmed umûr-ı esnâfı rü’yetde acz ve tekâsülü olmağla merkūm Hâfız Mehmed Usta kethudâlıkdan bi’l-külliye keff-i yed ve esnâfımızın kudemâsından örf ve âdetimize vâkıf ve nizâm [ve] intizâmımızı mûcib olan umûr ve ahvâlimize kemâ-yenbagī ârif ve her vechile kethudâlık hizmetini idâre ve rü’yete kādir [ve] cümlemizin muhtâr ve mu‘temedi olan işbu bâ‘isü’l-kitâb Mehmed Usta b. Ali nâm kimesneye kasr-ı yed etmekle, mezbûr Mehmed Usta kıbel-i şer‘den üzerimize kethudâ nasb ve ta‘yîn olunmak matlûbumuzdur deyü iltimâs etmeleriyle, hâkim-i muvakki‘-i sadr-ı kitâb ‒rafe‘a kadrehû mevlâhü’l-Vehhâb‒ efendi hazretleri dahi merkūm Mehmed Usta’yı kethudâ nasb ve ta‘yîn ve ber-mu‘tâd-ı kadîm umûrlarını idâre ve rü’yet ve hilâf-ı şer‘-i mutahhar bir ferdi rencîde etmemek üzere tenbîh buyurduklarında, ol dahi kabûl ve ber-vech-i muharrer hıdemât-ı lâzımesini kemâ-yenbagī mahâllinde ikāmete ta‘ahhüd etmeğin mâ-vaka‘a bi’t-taleb ketb olundu. Hurrire fî 21 min-Rebî‘ülevvel [li-]sene 1193. Şuhûdü’l-hâl: Mehmed Ağa Kethudâ-yı Muhzırân, Duhânî Muhzır Ali Çelebi, Molla İsmail b. Ali, Akşehirli Osman, Kemahlı İbrahim.