İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 56 Hüküm no: 11 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul paçacılar esnafının kethudalığına Hüseyin Usta b. İsmail’in tayin edildiği Kethudâ-yı paçacıyân Âsitâne-i aliyye’de vâki‘ paçacı esnâfının ihtiyâr ustalarından İbrahim Usta ve Mehmed Usta ve Ali Usta ve Hasan Usta ve Ahmed Usta ve diğer Ahmed Usta ve diğer [Ahmed] Usta ve Abdullah Usta ve Molla Halil Usta ve Ebûbekir Usta ve Molla Zeynel Usta ve Mehmed Usta ve İbrahim Usta ve İsmail Usta ve Osman Usta ve Mahmud Usta meclis-i şer‘-i şerîf-i enverde takrîr-i kelâm ve ta‘bîr ani’l-merâm edip kethudâmız olan Mustafa Usta nâm kimesne müfsid ve müzevvir olup ba‘zılarının gediklerini sahibinden iştirâ etmişidim deyü müzevver hüccetler ibrâzıyla da‘vâ-yı nizâ‘dan hâlî olmadığından mâ‘adâ esnâfı dâimâ tekdîr ve ta‘cîz ve tecrîm ve hilâf-ı şer‘-i mutahhar ve mugāyir-i nizâm-ı kadîm harekâta tesâddî etmekle azl olunup yerine esnâfımızın kudemâsından örf ve âdetimize vâkıf ve nizâm ve intizâmımızı mûcib olan umûr ve ahvâlimize kemâ-yenbagī ârif ve her vechile kethudâlık hizmetini rü’yete kādir [ve] cümlemizin muhtârı ve mu‘temedi olan işbu bâ‘isü’l-kitâb Hüseyin Usta b. İsmail nâm kimesne kıbel-i şer‘den üzerimize kethudâ nasb ve ta‘yîn olunmak matlûbumuzdur deyü iltimâs etmeleriyle, hâkim-i muvakki‘-i sadr-ı kitâb ‒rafe‘a kadrehû mevlâhü’l-Vehhâb‒ efendi hazretleri dahi mezbûr Mustafa Usta’yı azl ve yerine merkūm Hüseyin Usta’yı kethudâ nasb ve ta‘yîn ve umûrlarını ber-mu‘tâd-ı kadîm rü’yet ve bir ferdi hilâf-ı şer‘-i mutahhara rencîde etmemek üzere tenbîh buyurduklarında, ol dahi kabûl ve hidemât-ı lâzımesini mahâllinde kemâ-yenbagī ikāmete ta‘ahhüd etmeğin mâ-vaka‘a bi’t-taleb ketb olundu. Hurrire fî 14 Ra [li-]sene [1]193. Şuhûdü’l-hâl: Şâhidûne’s-sâbıkūn.