İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 56 Hüküm no: 12 Orijinal metin no: [3a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Bakkal Yani v. Yorgi’nin vârislerinin anlaştıkları Ahz ü kabz Mahmiye-i İstanbul’da Fener Kapısı dâhilinde Abdi Subaşı Mahallesi mütemekkinlerinden olup bundan akdem diyâr-ı âharda hâlik olan Bakkāl Yani v. Yorgi nâm zimmînin verâseti zevce-i metrûkesi Elina bt. Nikola nâm Nasrâniye ile sulbî kebîr oğulları Yorgaki ve Nikola’ya ve sulbiye kebîre kızı Marya Nasrâniyeye münhasıra olduğu ba‘de’t-tahakkukı’ş-şer‘î mersûm Yorgaki zimmî kendiden asâleten ve mersûme Elina Nasrâniye ile li-ebeveyn er karındaşı mesfûr Nikola ve li-ebeveyn kız karındaşı mersûme Marya Nasrâniye taraflarından husûs-ı âti’l-beyânda ber-vech-i câ’î sulh ve ibrâ ve kabz-ı bedele vekîlleri olduğu mersûmetân Elina ve Marya Nasrâniyelerin şahıslarını bi’l-ma‘rifeti’ş-şer‘iyye ârifân Mehmed Beşe b. Musa nâm kimesne ile Yuvan v. Anton nâm zimmî şehâdetleriyle şer‘an sâbit [3b] ve mütehakkık olmağla vekâleten meclis-i şer‘-i şerîf-i enverde hâmil-i hâze’r-rakīm Bakkāl Anton v. İlya ve Anaştaş v. Mayi ve Vasil v. Sava ve Sarafim v. Anaştaş nâm şerîkler muvâcehelerinde ikrâr-ı tâm ve takrîr-i kelâm edip babam hâlik-i mesfûr Yani hayatında mersûmûn ile mahrûse-i Galata’da Balıkhâne kurbünde vâki‘ tuzlayıcı bir bâb bakkāl dükkânında ve Eski Yağ Kapanı kurbünde câmi‘-i şerîf tahtında kezâlik tuzlayıcı bir bâb bakkāl dükkânında bakkāllık ticâretinde akd-i şirket edip re’s-i mâl olmak üzere mâlından mesfûrûna teslîm eylediği bin guruş ile dokuz senede fâide-i hâsıladan yedlerinde hissesi olan bin dokuz yüz guruş ki cem‘an iki bin dokuz yüz guruşu kable’l-ahz ve’l-istifâ babam mersûm Yani hâlik olup meblağ-ı mezbûr benim ile müvekkillerim mezbûrûna mevrûs olmağla, ben meblağ-ı mezbûru bundan akdem mersûmûn Anton ve Anaştaş ve Vasil ve Sarafim zimmîlerden taleb ve da‘vâ eylediğimde, onlar dahi külliyen inkâr etmeleriyle beynimizde münâza‘ât-ı kesîre ve muhâsemât-ı şedîde vâkı‘a olmuşidi. El-hâletü-hâzihî beynimize muslihûn tavassut edip da‘vâ-yı mezkûremden beni mersûmûn ile sekiz yüz altmış guruş üzerine ber-nehc-i şer‘î sulh eylediklerinde, ben-dahi sulh-i mezkûru kabûl ve bedel-i sulh olan meblağ-ı mezbûr sekiz yüz altmış guruşu mesfûrûn Anton ve Anaştaş ve Vasil ve Sarafim zimmîler yedlerinden tamamen ve kâmilen ahz ve kabz edip mâ‘adâsı olan iki bin kırk guruş mutâlebesine ve bi’l-cümle husûs-ı mezkûra müte‘allika târih-i kitâba gelince âmme-i de‘âvî ve mutâlebât ve kâffe-i eymân ve muhâsemâtdan merkūmûn Anton ve Anaştaş ve Vasil ve Sarafim ile şerîkleri gāibân ani’l-beled Mihal v. Mayi ve Kozma v. Togodoş zimmîlerden her birinin zimmetini ibrâ-i âmm-ı kātı‘ü’n-nizâ‘ ile bi’l-asâle ve bi’l-vekâle ibrâ ve ıskāt eylediğimde, onlar dahi ibrâ-i mezkûru kabûl eylediler dedikde gıbbe’t-tasdîkı’ş-şer‘î mesfûr Bakkāl Anton meclis-i mezkûrda mersûm Yorgaki zimmî muvâcehelerinde ikrâr-ı tâm ve takrîr-i kelâm edip bundan akdem hâlik olan Şerbetci Aci Yanaki zimmînin evlâd-ı sıgārının bâ-hüccet-i şer‘iyye vasîleri olduğum ecilden hâlik-i merkūm Bakkāl Yani zimmî hayatında sıgār-ı mezbûreye babaları hâlik-i mersûm Aci Yanaki zimmîden mevrûs mâllarından olmak üzere yedimden istidâne ve kabz eylediği iki bin guruşdan zimmetinde bâkī kalan sekiz yüz altmış guruşu bana kable’l-edâ ve’t-teslîm mersûm Yani hâlik olmağla, meblağ-ı bâkī-i mezbûru bi’l-verâse vâzı‘u’l-yed olduğu babası hâlik-i mersûm Yani zimmînin tereke-i vâfiyesinden ber-mantûk-ı i‘lâm bana edâsıyla merkūm Yorgaki zimmî ilzâm olunmuşidi. El-hâletü-hâzihî mesfûr Yorgaki meblağ-ı bâkī-i mezkûr sekiz yüz altmış guruşu babası hâlik-i mesfûrun tereke-i vâfiyesinden olmak üzere bana edâ ve teslîm eylediğinde, ben-dahi bi’l-vesâye yedinden tamamen ahz ü kabz ve tesellüm eyledim dedikde mezbûr Yorgaki dahi vasî-i mesfûr Anton zimmîyi tasdîk ve tahkīk etmeğin mâ-vaka‘a bi’t-taleb ketb olundu. Fî 18 Rebî‘ülevvel sene 1193. Şuhûdü’l-hâl: Pazarbaşı İbrahim b. Hacı Mehmed, Kâtib İsmail Efendi, Hasan Bölükbaşı, Todori v. Mihal, Peper-oğlu Niko, İlyas v. Mihal, Dimitri v. Kostantin, Kostantin, Anton v. Hristo, İstavri v. Anastaş.