İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 58 Hüküm no: 13 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Soğanağa Mahallesi’ndeki Ayşe Hatun bt. Şeyh Hatib Vakfı’nın mütevellî kaymakamlığına Müderris Eşrefzâde Fahreddin Efendi’nin tayin edildiği Nasb-ı kāimmakām İstanbul’da Soğanağa Mahallesi sâkinelerinden sahibetü’l-hayrât Âişe Hatun bt. Şeyh Hatîb’in iki kıt‘a vakfiyeleri mûcebince iki kıt‘a vakfına evlâdiyet ve meşrûtiyet ile mütevelliyesi olan fahrü’l-muhadderât Âişe Hanım bt. el-merhûm Şeyhülislâm-ı esbak Halil Efendi-zâde Mehmed Said Efendi tarafından ber-vech-i câ’î ikrâra vekîl olduğu zât-ı mûmâ-ileyhâyı bi’l-ma‘rifeti’ş-şer‘iyye ârifân Mehmed Efendi b. Abdullah ve Osman b. Efendi b. Ahmed nâm kimesneler şehâdetleriyle sâbit olan fahrü’l-müderrisîni’l-kirâm es-Seyyid Mehmed Efendi b. Ali meclis-i şer‘-i hatîr-i lâzımü’t-tevkīrde umdetü’l-müderrisîni’l-kirâm râfi‘-i hâzihi’l-vesîka Eşrefzâde Fahreddin Efendi b. es-Seyyid Hüsam-[4a]eddîn [Efendi] mahzarında bi’l-vekâle ikrâr-ı tâm ve takrîr-i kelâm edip müvekkile-i mûmâ-ileyhâ Âişe Hanım mütevelliyesi olduğu vakfeyn-i mezkûreynin umûrunu rü’yetde âcize olup ve mûmâ-ileyh es-Seyyid Fahreddin Efendi mûmâ-ileyhânın muhtârı ve emânet ve istikāmet ile mevsûf olduğunu zeyl-i kitâbda muharrerü’l-esâmî Müslimîn haber vermeleriyle tarafından kāimmakām-ı mütevellî nasb ve ta‘yîn olunmasını iltimâs eder dedikde, hâkim-i muvakki‘-i sadr-ı kitâb ‒tûbâ-lehû ve hüsnü-meâb‒ hazretleri dahi mûmâ-ileyh Eşrâf-[Eşref]-zâde es-Seyyid Fahreddin Efendi’yi kāimmakām-ı mütevellî nasb ve ta‘yîn, ol dahi kāimmakāmlık-ı mezkûru kabûl ve merâsimini edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 8 Rebî‘ülevvel sene 1193. Şuhûdü’l-hâl: Eşrâf-ı kuzât-ı Mısrıye’den Hıfzî Mustafa Efendi b. Mehmed, Umdetü’l-eşrâfi’l-kuzâtü’l-kirâm Behcetî es-Seyyid Hasan Efendi b. es-Seyyid Evliyâ, Mehmed Efendi b. Abdullah.