İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 59 Hüküm no: 14 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçekapı’daki Şekerci dükkânında yedi ay çalışan Mehmed b. Ali’nin Şekerci Osman Usta b. Mehmed’den sözleşmeleri üzere ücret talebinde bulunmayacağı Ecr-i mislinden ibrâ Mahmiye-i İstanbul hısnı ebvâbından Bahçe Kapısı dâhilinde Şekerci dükkânında sâkin es-Seyyid Mehmed b. Ali nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Şekerci Osman Usta b. Mehmed nâm kimesne tarafından husûs-ı âti’l-beyânda ber-vech-i câ’î tasdîka vekîl olduğu Ahmed b. Ömer ve Ebûbekir b. Mustafa nâm kimesneler şehâdetleriyle şer‘an sâbit ve mütehakkık olan Şekerci Mahmud Usta b. el-Hâc Ali nâm kimesne mahzarında ikrâr-ı tâm ve takrîr-i kelâm edip ben ücret ile hizmet eder makūlesinden <> olmam ile bundan akdem ücret kavlinsiz talebiyle müvekkil-i merkūm Osman Usta’ya yedi ay hizmet etmişidim. El-hâletü-hâzihî hizmet-i mezkûremin ecr-i misli mutâlebesine ve bi’l-cümle husûs-ı mezkûra müte‘allika târih-i kitâba gelince âmme-i de‘âvî ve mutâlebât ve kâffe-i eymân ve muhâsamâtdan müvekkil-i merkūm Osman Usta’nın zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru kabûl eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 Rebî‘ülevvel sene 1193. Şuhûdü’l-hâl: Ahmed b. Ömer el-mezkûr, Ebûbekir b. Mustafa el-mezkûr, İsmail Çelebi.