İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 59 Hüküm no: 15 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Bofko v. Dabe’nin Nakkaşpaşa yakınındaki ekmekçi fırını ve Balatkapısı’ndaki değirmenindeki bir hissesini İslam Beşe ve Muslı Beşe b. Abdullah kardeşlere iki yüz guruşa sattığı Mübâya‘a-i habbâz Habbâz tâifesinden Bofko v. Dabe nâm zimmî meclis-i şer‘-i hatîr-i lâzımü’t-tevkīrde bâ‘is-i hâzihi’l-vesîka İslâm Beşe ve Muslı Beşe ibney Abdullah nâm karındaşlar taraflarından husûs-ı âti’l-beyânda ber-vech-i câ’î tasdîka vekîl-i şer‘îleri olan Molla Ahmed b. Şahin nâm kimesne mahzarında ikrâr-ı tâm ve takrîr-i kelâm edip Mahmiye-i İstanbul’da Nakkāş Paşa kurbünde vâki‘ bir bâb ekmekçi fırını ve ona merbût Balat Kapısı dâhilinde Kebecioğlu değirmeni demekle ma‘rûf on altı sehim i‘tibâr olunan dört horoslu bir bâb değirmen derûnunda mevcûde beyne’l-hiref gedik ta‘bîr olunur on altı re’s bargirden akd-i âtiyyü’z-zikrin sudûruna dek yedimde mâlım olan bir re’s bargir ve bir re’s bargire isâbet eden âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile iki yüz guruşa müvekkilân-ı mezbûrân İslâm Beşe ve Muslı Beşe’ye ale’l-iştirâki’s-seviy bey‘ ve temlîk ve teslîm eylediğimde, onlar dahi ber-vech-i muharrer iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezbûr iki yüz guruşu müvekkilân-ı merkūmânın yedlerinden tamamen tesellüm ve ahz ü kabz edip mebî‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsamâtdan müvekkilân-ı mezbûrânın zimmetlerini ibrâ-i âm ile ibrâ ve ıskāt eylediğimde, onlar dahi ibrâ-i mezkûru kabûl eylediler. Ba‘de’l-yevm benim asla alâka ve medhalim kalmayup mârrü’z-zikr bir re’s bargir ve bir re’s bargire isâbet eden âlât-ı lâzıme-i ma‘lûme müvekkilân-ı merkūmân İslâm Beşe ve Muslı Beşe’nin ale’l-iştirâki’s-seviy mülk-i müşterâları olmuşdur, keyfe mâ yeşâ’ân mutasarrıfân olsunlar dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 Rebî‘ülevvel sene [1]193. Şuhûdü’l-hâl: Kethudâları İsmail Ağa, Yiğitbaşı Molla Ahmed, Sayıcı Molla Osman, es-Seyyid Mehmed Said, Hâfız Mustafa, Fındıklı[lı] Mehmed Ağa, Bediroğlu Molla Ali.