İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 60 Hüküm no: 16 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Hristo v. Nedelko’nun Kumkapı’daki ekmekçi fırını ve Et Meydanı yakınındaki değirmenin dört hissesini Kara Osman b. Hasan ile Yankula v. Miho’ya dokuz yüz guruşa sattığı Mübâya‘a-i habbâz Habbâz tâifesinden Hristo v. Nedelko nâm zimmî meclis-i şer‘-i hatîr-i lâzımü’t-tevkīrde yine habbâz tâifesinden bâ‘is-i hâzihi’l-vesîka Kara Osman b. Hasan nâm kimesne ile Yankula v. Miho nâm zimmî muvâcehelerinde ikrâr-ı tâm ve takrîr-i kelâm edip mahmiye-i İstanbul’da Kumkapı dâhilinde Nişâncı Paşa kurbünde vâki‘ el-Hâc Hasan fırını demekle ma‘lûm bir bâb ekmekci fırını ve ona merbût Et Meydânı kurbünde Karayatak ta‘bîr olunur on altı sehim i‘tibâr olunan dört horoslu bir bâb değirmen derûnunda mevcûde beyne’l-hiref gedik ta‘bîr olunur on altı re’s bargirden akd-i âti’z-zikrin sudûruna dek yedimde mülküm olan dört re’s bargir ve dört re’s bargire isâbet eden âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile <> dokuz yüz guruşa merkūmân Kara Osman ve Yankula’ya ale’l-iştirâki’s-seviy bey‘ ve temlîk ve teslîm, onlar dahi ber-vech-i muharrer iştirâ ve temellük ve tesellüm ve kabûl eylediklerinden sonra semeni olan meblağ-ı mezbûr dokuz yüz guruşu müşteriyân-ı mezbûrânın yedlerinden tamamen ahz ve kabz edip mebî‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsamâtdan merkūmânın zimmetlerini ibrâ-i âm ile ibrâ ve ıskāt eylediğimde, onlar dahi ibrâ-i mezkûru kabûl eylediler. Ba‘de’l-yevm benim asla alâka ve medhalim kalmayup zikrolunan dört re’s bargir ve dört re’s bargire isâbet eden âlât-ı lâzıme-i ma‘lûme müşteriyân-ı merkūmân Kara Osman ve Yankula’nın bi’l-münâsafa mülk-i müşterâları olmuşdur, keyfe mâ yeşâ’ân mutasarrıfân olsunlar dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 Ra sene [1]193. Şuhûdü’l-hâl: Şâhidûne’s-sâbıkūn.