İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 61 Hüküm no: 17 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Hristo v. Nedelko’nun Nakkaşpaşa yakınındaki ekmekçi fırını ve Balatkapısı’ndaki değirmenin dört hissesini İslam Beşe ve Muslı Beşe b. Abdullah kardeşlere sekiz yüz guruşa sattığı Mübâya‘a-i habbâz Habbâz tâifesinden Hristo v. Nedelko nâm zimmî meclis-i şer‘-i hatîr-i lâzımü’t-tevkīrde yine habbâz tâifesinden bâ‘is-i hâzihi’l-vesîka İslâm Beşe ve Muslı Beşe nâm karındaşlar taraflarından husûs-ı âti’l-beyânda ber-vech-i câ’î tasdîka vekîl-i şer‘îleri olan Molla Ahmed b. Şahin nâm kimesne mahzarında ikrâr-ı tâm ve takrîr-i kelâm edip mahmiye-i İstanbul’da Nakkāş Paşa kurbünde vâki‘ bir bâb ekmekçi fırını ve ona merbût Balat Kapısı dâhilinde Kebecioğlu değirmeni demekle ma‘rûf on altı sehim i‘tibâr olunan dört horoslu bir bâb değirmen derûnunda mevcûde beyne’l-hiref gedik ta‘bîr olunur on altı re’s bargirden akd-i âti’z-zikrin sudûruna dek yedimde emvâlim olan dört re’s bargir ve dört re’s bargire isâbet eden âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile sekiz yüz guruşa müvekkilân-ı mezbûrân İslâm Beşe ve Muslı Beşe’ye ale’l-iştirâki’s-seviy bey‘ ve temlîk ve teslîm eylediğimde, onlar dahi ber-vech-i muharrer iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezbûr sekiz yüz guruşu müvekkilân-ı mezbûrânın yedlerinden tamamen tesellüm ve ahz ü kabz edip mebî‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsamâtdan müvekkilân-ı mezbûrânın zimmetlerini ibrâ-i âm ile ibrâ ve ıskāt eylediğimde, onlar dahi ibrâ-i mezkûru kabûl eylediler. Ba‘de’l-yevm benim asla alâka ve medhalim kalmayup zikrolunan dört re’s bargir ve dört re’s bargire isâbet eden âlât-ı lâzıme-i ma‘lûme müvekkilân-ı mezbûrân İslâm Beşe ve Muslı Beşe’nin bi’l-münâsafa mülk-i müşterâları olmuşdur, keyfe mâ yeşâ’ân mutasarrıfân olsunlar dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 min-Ra sene [1]193. Şuhûdü’l-hâl: Şâhidûne’s-sâbıkūn.