İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 62 Hüküm no: 18 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mustafa’nın Mahmudpaşa yakınındaki bir menzil ve altındaki altı dükkânın nısfını iki bin dört yüz kırk üç guruş borcuna bedel olarak kocası Hammâmî Ahmed Ağa’ye terk ettiği Deyni mukābelesinde ferâğ-ı dekâkîn Mahmiye-i İstanbul’da Mahmudpaşa Mhallesi’nde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Fâtıma bt. Mustafa nâm hatun meclis-i şer‘-i şerîf-i enverde, hâlâ zevci işbu bâ‘isü’l-kitâb Hammâmî es-Seyyid Ahmed Ağa b. es-Seyyid Ali nâm kimesne mahzarında ikrâr-ı tâm ve takrîr-i kelâm edip ashâb-ı hayrâtdan merhûm Çizmecibaşı Vakfı müstegallâtından olup Mahmudpaşa kurbünde Tahta karşısında vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât bir bâb menzil ile menzil-i mezkûrun tahtında kâin birbirine muttasıl altı bâb dükkânların ber-mantûk-ı temessükât icâre-i mü’eccele-i kadîme-i ma‘lûme ile taht-ı tasarrufumda olan nısıflarını zevcim mezbûr es-Seyyid Ahmed Ağa’ya cihet-i karzdan zimmetimde deynim olan iki bin dört yüz kırk üç guruş bedel mukābelesinde ferâğ-ı kat‘î-i mu‘teber ile bâ-re’y-i mütevellî-i vakf-ı mezbûr zevcim merkūm es-Seyyid Ahmed Ağa’ya ferâğ ve tefvîz ve teslîm eylediğimde, ol dahi ber-vech-i muharrer tefevvüz ve tesellüm ve kabûl eyledikden sonra bedel-i merkūm iki bin <> dört yüz kırk üç guruşun istifâsına ve bi’l-cümle husûs-ı mezkûra müte‘allika âmme-i da‘vâdan zevcim mezbûr es-Seyyid Ahmed Ağa benim zimmetimi ibrâ-i âm ile ibrâ ve ıskāt eylediğinde, ben-dahi zikrolunan menzil ve dekâkînin nısflarına ve bi’l-cümle husûs-ı mezkûra müte‘allika âmme-i da‘vâdan zevcim mezbûr es-Seyyid Ahmed Ağa’nın zimmetini ibrâ-i âm ile ibrâ ve ıskāt edip ve her birimiz âharın ibrâsını kabûl eyledik. <> Ba‘de’l-yevm benim asla <> alâka ve medhalim kalmayup sâlifü’z-zikr menzil ve dekâkînin nısfların zevcim mezbûr es-Seyyid Ahmed Ağa’nın dâhil-i havza-i tasarrufu olmuşdur dedikde mezbûr es-Seyyid Ahmed Ağa dahi mukırra-i merkūme Fâtıma Hatun’u kelimât-ı meşrûhasında vicâhen ve şifâhen tasdîk ve tahkīk etmeğin mâ-vaka‘a bi’t-taleb ketb olundu. Fî 22 Rebî‘ülevvel sene 1193. Şuhûdü’l-hâl: Çavuşlar Kâtibi İbrahim Efendi, Yolgeçen Hâncısı Süleyman Ağa, Duhancı Ali Ağa, İmâm Ömer Efendi, Müezzin Molla Mustafa.