İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 62 Hüküm no: 19 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tayyibe bt. Mehmed’in boşandığı kocası Muhaddis Ahmed Efendi b. Abdüsselam’dan mehir ve nafakasını aldığı ve birbirlerinin zimmetlerini ibrâ ettikleri Muhâla‘a Mahmiye-i İstanbul’da Muradpaşa Mahallesi’nde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Tayyibe bt. el-Hâc Mehmed nâm hatun meclis-i şer‘-i hatîr-i lâzımü’t-tevkīrde zevc-i muhâlı‘ı bâ‘isü’l-kitâb Muhaddis el-Hâc Ahmed Efendi b. Abdüsselam mahzarında ikrâr-ı tâm ve takrîr-i kelâm edip merkūm el-Hâc Ahmed Efendi zevc-i dâhilim olup beynimizde hüsn-i mu‘âşeretimiz olmayıp ben hul‘a tâlibe olmamla, zevcim mezbûrun zimmetinde mütekarrir ve ma‘kūdün-aleyh olan yetmiş beş guruş mehr-i mü’eccel hakkım ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere merkūm el-Hâc Ahmed Efendi ile muhâla‘a-i sahîha-i şer‘iyye hul‘ olduğumda, ol dahi minvâl-i muharrer hul‘-ı mezkûru ba‘de’l-kabûl hukūk-ı zevciyete ve sâire müte‘allika <<‘âmme>> işbu târih-i kitâba gelince âmme-i de‘âvî ve mutâlebât ve kâffe-i eymân ve muhâsamâtdan her birimiz âharın zimmetini ibrâ-i âm ile ibrâ ve ıskāt edip ve her birimiz âharın ibrâsını kabûl eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 Ra sene [1]193. Şuhûdü’l-hâl: Fahrü’l-müderrisîni’l-kirâm es-Seyyid Mehmed Şemseddin Efendi, Mahtûmîzâde Abdurrahman Efendi, es-Seyyid Yusuf Efendi, el-Hâc Ebûbekir Efendi.