İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 63 Hüküm no: 20 Orijinal metin no: [5a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhaddis Ahmed Efendi b. Abdüsselam’ın üzerine oğlu Mehmed Salih için günlük yirmi akçe nafaka takdir edildiği Nafaka Mahmiye-i İstanbul’da Muradpaşa Mahallesi’nde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan bâ‘isetü hâze’l-vesîka Tayyibe bt. el-Hâc Ahmed [Mehmed] nâm hatun meclis-i şer‘-i hatîr-i lâzımü’t-tevkīrde zevc-i sâbıkı Muhaddis el-Hâc Ahmed Efendi b. Abdüsselam nâm kimesne mahzarında ikrâr-ı tâm ve takrîr-i kelâm edip zevcim mezbûr el-Hâc Ahmed Efendi’nin firâşından hâsıl ve benden mütevellid ve hâlâ bi-hakkı’l-hıdâne hacr ve terbiyemde olan sadrî oğlum işbu Mehmed Salih nâm sagīrin mâlı olmayıp nafaka ve kisve-bahâya eşedd-i ihtiyâc ile muhtâc olmağla, babası mezbûr el-Hâc Ahmed Efendi üzerine kıbel-i şerî‘at-i garrâdan kadr-ı ma‘rûf nafaka ve kisve-bahâ farz ve takdîr olunmak bi’l-hıdâne matlûbumdur dedikde gıbbe’t-tasdîkı’ş-şer‘î hâkim-i muvakki‘-i sadr-ı kitâb ‒rafe‘a kadrehû mevlâhü’l-Vehhâb [5b] tûbâ-lehû ve hüsnü-meâb‒ efendi hazretleri dahi sagīr-i mezbûr Mehmed Salih’in nafaka ve kisve ve sâir levâzım-ı zarûriyesi’çün babası merkūm el-Hâc Ahmed Efendi üzerine işbu târih-i kitâbdan külle yevm yirmişer akçe nafaka ve kisve-bahâ farz ve takdîr buyurup meblağ-ı mefrûz-ı mezkûr yevmî yirmişer akçeyi ber-minvâl-i muharrer sagīr-i mezbûra harc ve sarfa ve lede’l-hâce istidâneye ve vakt-i zaferde merkūm el-Hâc Ahmed Efendi üzerine rücû‘a mezbûre Tayyibe Hatun’a izin vermeğin mâ-vaka‘a bi’t-taleb ketb olundu. Fî 22 [28] Ra sene [1]193. Şuhûdü’l-hâl: Şâhidûne’s-sâbıkūn.