İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 64 Hüküm no: 21 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Şam Kapıkulu Ağası Mustafa Ağa b. Ali Ağa’nın Şam’daki menzil ve çiftliğinin nısfının vârislerince Muvakkat Anadolu Muhâsebecisi Hüseyin Efendi b. Mahmud’a on iki bin guruşa satıldığı Şâm-ı şerîf’de mübâya‘a-i menzil 12000 Mahrûse-i Şâm-ı şerîf’de sâkin iken bundan akdem intikāl-i dâr-ı bekā eden Şâm-ı şerîf Kapıkulu Ağası es-Seyyid Mustafa Ağa b. es-Seyyid Ali Ağa’nın verâseti zevce-i menkûha-i metrûkesi Fâtıma bt. es-Seyyid Ebûbekir nâm hatun ile sulbî kebîr oğulları es-Seyyid Ali Ağa ve es-Seyyid Esad Ağa’ya ve sulbiye kebîre kızı [Şerîfe] Sâliha’ya münhasıra olduğu ba‘de’t-tahakkuk-ı şer‘î sâbıkā Şâm-ı şerîf kapıkulu ağası olup mahmiye-i İstanbul’da Pirinçci Sinan Mahallesi’nde müsâfiren sâkin olan mezbûr es-Seyyid Ali Ağa kendiden asâleten ve vâlidesi mezbûre Fâtıma ile li-ebeveyn kız karındaşı merkūme Şerîfe Sâliha hatunlar taraflarından husûs-ı âti’l-beyânda ber-vech-i câ’î [bey‘ ve hîbeye] vekîl-i şer‘îleri olmağla vekâleten ve yine mahalle-i merkūmede müsâfiren sâkin mezbûr es-Seyyid Esad Ağa asâleten meclis-i şer‘-i hatîr-i lâzımü’t-tevkīrde muvakkaten Anadolu Muhâsebecisi olan hâcegân-ı Dîvân-ı hümâyûn’dan umdetü erbâbü’t-tahrîr ve’l-kalem zübdetü ashâbi’t-tastîr ve’r-rakām râfi‘-i hâze’l-kitâbi’l-müstetâb es-Seyyid el-Hâc Hasan [Hüseyin] Efendi b. Mahmud mahzarında her biri ikrâr-ı tâm ve takrîr-i kelâm edip babamız müteveffâ-yı mezbûrun hayatında ile’l-vefât müstakillen yedinde mülkü ba‘de vefâtihî bizim ile müvekkiletân-ı mezbûretâna mevrûs olup sâlifü’z-zikr Şâm-ı şerîf’de Atpazarı’nda vâki‘ babamız müteveffâ-yı mezbûr es-Seyyid Mustafa Ağa’ya intimâ ile tahdîd ve tavsîfden müstağnî dâhiliye ve hâriciyeli büyût-ı adîde ve kusûr-ı müte‘addide ve müştemilât-ı sâire-i ma‘lûmeyi hâvî bir bâb menzil ile yine Şâm-ı şerîf’de Hırısta? nâm karyede kâin lede’l-ahâlî ve’l-cîrân ma‘lûmü’l-hudûd ve’l-müştemilât bir kıt‘a mülk çiftlikden ale’l-iştirâki’s-seviy yedimizde mülkümüz olan nısf hisse-i müfrezemizi, bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık işbu târih-i kitâbdan on ay tamamına dek bi-tarîkı’l-vefâ mûmâ-ileyh es-Seyyid el-Hâc Hüseyin Efendi’nin sulbiye sagīre kızları Şerîfe Safiye ve Şerîfe Fâtıma içün babaları mûmâ-ileyh es-Seyyid Hüseyin Efendi’ye on iki bin guruşa bi’l-asâle ve bi’l-vekâle bey‘ ve mahâllinde teslîm eylediğimizde, ol dahi ber-minvâl-i muharrer tarîk-i mezkûr üzere bi’l-velâye iştirâ ve tesellüm ve kabûl eyledikden sonra müvekkil-i mûmâ-ileyh el-Hâc Hüseyin Efendi bundan akdem kendi mâlından kızları sagīretân-ı mezbûretândan her birine başka başka altışar bin guruş hîbe-i sahîha-i şer‘iyye ile hîbe ve temlîk ve her biri içün meclis-i hîbede bi’l-velâye ittihâb ve tesellüm ve kabz etmekle semeni olan meblağ-ı mezbûr on iki bin guruşu ber-vech-i muharrer sagīretân-ı mezbûretânın mâllarından olmak üzere bize def‘ ü teslîm eylediğinde, biz dahi yedinden tamamen tesellüm ve ahz ü kabz eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 5 Rebî‘ülâhir sene [1]193. Şuhûdü’l-hâl: Umdetü’l-müderrisîni’l-kirâm zübdetü’l-mehâdîmü’l-fihâm fazîletlü Mehmed Ârif Molla Efendi, Fahrü’l-müderrisîni’l-kirâm Mehmed Salih Efendi b. el-müvellâ el-merhûm Mustafa Efendi, Zübdetü’l-müderrisîni’l-kirâm Muradzâde es-Seyyid Mehmed Murad Efendi b. el-müvellâ el-merhûm es-Seyyid Ahmed Efendi, Müderrisîn-i kirâmdan Necibzâde es-Seyyid Feyzullah Efendi.