İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 65 Hüküm no: 22 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Marin v. Toros’un Tophane Kapıiçi’ndeki ekmekçi fırını ve değirmenindeki üçte bir hissesini Abram v. Aleksan’a bin beş yüz guruşa sattığı Mübâya‘a-i habbâz Habbâz tâifesinden Marin v. Toros nâm zimmî meclis-i şer‘-i hatîr-i lâzımü’t-tevkīrde hâmil-i hâze’r-rakīm Abram v. Aleksan nâm zimmî muvâcehesinde ikrâr-ı tâm ve takrîr-i kelâm edip mahrûse-i Galata’ya muzâfe kasaba-i Tophâne’de Kapıiçi nâm mahâlde vâki‘ bir bâb ekmekçi fırını ve ona merbût karşısında kâin dört horos[lu] değirmenin derûnunda mevcûde erbâbı beyninde mu‘teber gedik ta‘bîr olunur on altı re’s bargir ve bi’l-cümle âlât-ı lâzıme-i ma‘lûmenin üç sehim i‘tibâriyle bir sehmi benim ve iki sehmi mersûm Abram zimmînin ale’l-iştirâk yedimizde mülkümüz olmağla, zikrolunan fırın ve değirmenin gedikleri ta‘bîr olunur sâlifü’z-zikr bargirler ve bi’l-cümle âlât-ı lâzıme-i ma‘lûmede akd-i âti’z-zikrin sudûruna dek yedimde mülküm olan bir sehm-i şâyi‘-i mezkûrumu tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î <> ve safka-i vâhide ile bin beş yüz guruşa mersûm Abram zimmîye bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm bin beş yüz guruşu bana def‘ ü teslîm eylediğinde, ben-dahi yedinden tamamen tesellüm ve ahz ü kabz edip mebî‘-i mezkûrun tağrîr ve gabnine ve istifâ-i semenine ve bi’l-cümle gedik husûsuna müte‘allika âmme-i da‘vâdan her birimiz âharın zimmetini ibrâ-i âm ile ibrâ ve ıskāt edip ve her birimiz âharın ibrâsını kabûl eyledik. Ba‘de’l-yevm benim asla alâka ve medhalim kalmayup sâlifü’z-zikr fırın ve değirmenin gedikleri ta‘bîr olunur bargirler ve bi’l-cümle âlât-ı lâzıme-i sâire-i ma‘lûme müşteri-i mersûm Abram zimmînin müstakillen mülkü ve hakk-ı sırfı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 5 Rebî‘ülâhir sene 1193. Şuhûdü’l-hâl: Habbâzân Kethudâsı İsmail Ağa, Yiğitbaşı Molla Ahmed, es-Seyyid Mehmed Said, Bediroğlu Molla Ali, Bedir Beşe, Ahram, Vartan, diğer Vartan, Agop, Serkiz.