İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 67 Hüküm no: 24 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Hüseyin b. Ahmed’in Tophane’deki ekmekçi fırın ve değirmenindeki altı hissesini Mehmed Emin Ağa b. İbrahim’e iki bin yedi yüz elli altı guruşa sattığı Mübâya‘a-i habbâz Habbâz tâifesinden Hüseyin b. Ahmed nâm kimesne meclis-i şer‘-i şerîf-i enverde işbu bâ‘isü’l-kitâb el-Hâc Mehmed Emin Ağa b. el-Hâc İbrahim nâm kimesne mahzarında ikrâr-ı tâm ve takrîr-i kelâm edip mahrûse-i Galata’ya muzâfe kasaba-i Tophâne’de vâki‘ Yamalı demekle <> ma‘lûm bir bâb ekmekçi fırını ve ona merbût Kapıiçi nâm mahâlde on altı sehim i‘tibâr olunan dört horoslu bir bâb değirmen derûnunda mevcûde beyne’l-hiref gedik ta‘bîr olunur on altı re’s bargir ve âlât-ı lâzıme-i sâire-i ma‘lûmenin i‘tibâr-ı mezkûr üzere dokuz sehmi benim ve üç sehmi Zeynel nâm kimesnenin ve dört sehmi Hristo nâm zimmînin yedimizde emvâlimiz olmağla, hâlâ ben ber-vech-i muharrer i‘tibâr-ı mezkûr üzere âlât-ı mezkûrenin akd-i âti’z-zikrin sudûruna dek yedimde mülküm olan dokuz sehm-i mezkûrumdan üç sehmini yedimde ibkā edip mâ‘adâsı olup altı sehme isâbet eden altı re’s bargir ve altı re’s bargir[e] iktizâ eden âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile iki bin yedi yüz elli altı guruşa mezbûr el-Hâc Mehmed Ağa’ya bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr iki bin yedi yüz elli altı guruşu bana def‘ ve teslîm eylediğinde, ben-dahi yedinden tamamen tesellüm ve ahz ü kabz edip mebî‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsamâtdan mezbûr el-Hâc Mehmed Ağa’nın zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru kabûl eyledi. Ba‘de’l-yevm sâlifü’z-zikr altı re’s bargir ve altı re’s bargire isâbet eden âlât-ı lâzıme-i ma‘lûmede benim alâkam kalmayup müşteri-i mersûm el-Hâc Mehmed Ağa’nın mülk-i müşterâsı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 12 Rebî‘ülâhir sene 1193. Şuhûdü’l-hâl: Habbâzân Kethudâsı İsmail Ağa, Yiğitbaşı Molla Ahmed, Bediroğlu Molla Ali, es-Seyyid Mehmed Said, Abram, Vartan, diğer Vartan, Serkiz, Agop.