İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 68 Hüküm no: 25 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nalbur İsmail Ağa b. Süleyman’ın Nalburlar Çarşısı’ndaki nalbur dükkânı gediğini Nalburlar Kethudası Ahmed Ağa b. Abdullah’a üç yüz elli guruşa sattığı Mübâya‘a-i gedik-i na‘lbur Mahmiye-i İstanbul’da Hızır Bey Mahallesi’nde sâkin na‘lbur İsmail Ağa b. el-Hâc Süleyman nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Na‘lburlar Kethudâsı el-Hâc Ahmed Ağa b. Abdullah nâm kimesne mahzarında ikrâr-ı tâm ve takrîr-i kelâm edip akd-i âti’z-zikrin sudûruna dek müstakillen yedimde emvâlim olup mahmiye-i merkūmede Rüstem Paşa Câmi‘-i şerîfi kurbünde Na‘lburlar sûkunda vâki‘ bir bâb na‘lbur dükkânı derûnunda mevcûde beyne’l-hiref gedik ta‘bîr olunur iki kantar ve bir terâzi ma‘a derâhim ve bir tâslı kantar ve bir çekmece ve bir bakır mangal ve üç yasdık ve bir akçe tahtası ve bir Mısır hasırı ile âlât-ı sâire-i ma‘lûmemin nısflarını, tarafeynden îcâb [7a] ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile üç yüz elli guruşa mezbûr el-Hâc Ahmed Ağa’ya bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabûl ve semeni olan meblağ-ı mezbûr üç yüz elli guruşu bana def‘ ü teslîm eylediğinde, ben-dahi yedinden tamamen tesellüm ve ahz ü kabz edip mebî‘-i mezkûrun tağrîr ve gabnine müte‘allika âmme-i de‘âvî ve mutâlebât ve kâffe-i eymân ve muhâsamâtdan merkūm el-Hâc Ahmed Ağa’nın zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru kabûl eyledi. Ba‘de’l-yevm âlât-ı mezkûrenin nısf-ı şâyi‘i benim yedimde bâkī kalıp nısf-ı âharı müşteri-i mezbûr el-Hâc Ahmed Ağa’nın emvâl-i müşterâtı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 22 Rebî‘ülâhir sene 1193. Şuhûdü’l-hâl: Yiğitbaşı Abdi Efendi b. Ali, el-Hâc Süleyman b. Mustafa, el-Hâc İbrahim Efendi b. Ali, Molla el-Hâc İbrahim b. Mustafa, el-Hâc Hüseyin Ağa b. Ali.