İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 69 Hüküm no: 26 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Horasancı Agop v. Kigork’un İsa Mahallesi ve Zalpaşa’daki horasancı işyerleri eşyalarının üçer hisselerini Horasancı Arutin v. Arakil’e beş yüz guruşa sattığı Mübâya‘a-i horasancı Mahmiye-i İstanbul’da Unkapanı kurbünde mütemekkin Horasancı Agop v. Kigork nâm zimmî tarafından husûs-ı âti’l-beyânda ber-vech-i câ’î bey‘ ve kabz-ı semen ve ibrâya vekîl olduğu İstefan v. Mikail ve Mikail v. İstefan nâm zimmîler şehâdetleriyle şer‘an sâbit ve mütehakkık olan Aleksan v. Simaven nâm zimmî meclis-i şer‘-i şerîf-i enverde hâmil-i hâze’r-rakīm Horasancı Arutin v. Arakil nâm zimmî muvâcehesinde bi’l-vekâle ikrâr-ı tâm ve takrîr-i kelâm edip mahmiye-i merkūmede Balat kurbünde el-Hâc İsa Mahallesi’nde vâki‘ İbrahim Hanzâde Vakfı’ndan olan bir bâb horasancı kârhânesi derûnunda mevcûde beyne’l-hiref gedik ta‘bîr olunur bir çift taş ve iki re’s bargir ve on iki fıçı ve bir çift kova ve iki el kovası ve altı kürek ve altı küfe ve iki çift çatal küfe ve altı kalbur ve sâir âlât-ı lâzıme-i ma‘lûme ile medîne-i Hazret-i Ebâ Eyyûb el-Ensârî’de Zâlpaşa kurbünde vâki‘ bir bâb horasancı kârhânesi derûnunda mevcûde kezâlik gedik ta‘bîr olunur bir çift taş ve iki re’s bargir ve on iki fıçı ve bir çift kova ve iki el kovası ve altı kürek ve altı küfe ve altı kalbur ve iki çatal küfe ve sâir âlât-ı lâzıme-i ma‘lûmenin on altı sehim i‘tibâriyle müvekkilim mezbûr Agop zimmînin mârrü’z-zikr iki bâb horasancı kârhânesinin her birinde akd-i âti’z-zikrin sudûruna değin yedinde mülkü olan üçer sehm-i şâyi‘ini, tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile beş yüz guruşa bi’l-vekâle mersûm Arutin zimmîye bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabûl ve semeni olan meblağ-ı mezbûr beş yüz guruşu bana def‘ ü teslîm, ben-dahi ber-vech-i muharrer yedinden tamamen tesellüm ve ahz ü kabz edip bey‘-i mezkûrun tağrîr ve gabnine ve bi’l-cümle gedik husûsuna müte‘allika âmme-i da‘vâdan mersûm Arutin zimmînin zimmetini ibrâ-i âm ile bi’l-vekâle ibrâ ve ıskāt eylediğimde, ol dahi ibrâ-i mezkûru kabûl eyledi. Ba‘de’l-yevm iki bâb kârhâne derûnlarında mevcûde mârrü’z-zikr âlât-ı ma‘lûmelerin i‘tibâr-ı mezkûr üzere üçer sehm-i şâyi‘i mersûm Arutin zimmînin emvâl-i müşterâsı olup müvekkilim mersûmun asla alâkası kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 26 Rebî‘ülâhir sene 1193. Şuhûdü’l-hâl: Mehmed Ağa Kethudâ-yı Muhzırân, Molla İsmail b. Ali, Molla Said tâbi‘-i Kethudâ-yı Muhzırân, Horasancı Kethudâsı Karabet v. Sahak, Minas v. Asvador, Kogas v. Aknados, Avanes v. ( ), Hıdır v. Dursun, Asvador v. Avanes.