İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 70 Hüküm no: 27 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Horasancı Agop v. Kigork’un Çıkrıkçı Kemal Mahallesi’ndeki horasancı işyeri eşyalarını Horasancı Arutin v. Arakil’e bin yüz guruşa sattığı Mübâya‘a-i horasancı Mahmiye-i İstanbul’da Unkapanı kurbünde mütemekkin horasancı tâifesinden Agop v. Kigork nâm zimmî tarafından husûs-ı âti’l-beyânda ber-vech-i câ’î bey‘ ve kabz-ı semen ve ibrâya vekîl olduğu İstefan v. Mikail ve Mikail v. İstefan nâm zimmîler şehâdetleriyle şer‘an sâbit ve mütehakkık olan Aleksan v. Simaven nâm zimmî meclis-i hatîr-i lâzımü’t-tevkīrde hâmil-i hâze’r-rakīm Horasancı Arutin v. Arakil zimmî muvâcehesinde bi’l-vekâle ikrâr-ı tâm ve takrîr-i kelâm edip mahmiye-i mezbûrede Sarıgez (Sarıgörez) kurbünde Çıkrıkcı Kemâl Mahallesi’nde vâki‘ bir bâb horasancı dükkânında mevcûd[e] müvekkilim mesfûr Agop zimmînin akd-i âtiyyü’z-zikrin sudûruna değin yedinde emvâli olan beyne’l-hiref gedik ta‘bîr olunur bir kebîr horasancı taşı ve bir re’s bargir ve sagīr ve kebîr yirmi beş fıçı ve on beş sepet ve beş kazma ve dört kîle ve sâir âlât-ı lâzıme-i ma‘lûmesini tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile bin yüz guruşa bi’l-vekâle mersûm Arutin zimmîye bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabûl ve semeni olan meblağ-ı mezbûr bin yüz guruşu bana def‘ ü teslîm, ben-dahi yedinden tamamen tesellüm ve ahz ü kabz edip bey‘-i mezkûrun tağrîr ve gabnine ve bi’l-cümle gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsamâtdan mersûm Arutin zimmînin zimmetini bi’l-vekâle ibrâ-i âm ile ibrâ ve ıskāt eylediğimde, ol dahi ibrâ-i mezkûru kabûl eyledi. Ba‘de’l-yevm müvekkilim mersûm Agop zimmînin asla alâka ve medhali kalmayup âlât-ı merkūme müşteri-i mersûm Arutin zimmînin emvâl-i müşterâsı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 26 Rebî‘ülâhir sene 1193. Şuhûdü’l-hâl: Mehmed Ağa Kethudâ-yı Muhzırân, Molla İsmail b. Ali, Molla Said tâbi‘-i Kethudâ-yı Muhzırân, Horasancılar Kethudâsı Kazer [Karabet] v. Sahak, Kogas v. Aknados, Minas v. Asvador, Avanes v. ( ), Hıdır v. Dursun.