İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 70 Hüküm no: 28 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Efendi b. Ebubekir Efendi üzerine kızı Fâtıma için günlük kırk akçe nafaka takdir edildiği Nafaka Mahrûse-i Galata’ya muzâfe Kasaba-i Kasımpaşa’da Servi Mahallesi’nde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan bâ‘isetü hâzihi’l-vesîka Hadîce bt. eş-Şeyh Selim Efendi nâm hatun meclis-i şer‘-i hatîr-i lâzımü’t-tevkīrde mahmiye-i İstanbul’da Yenikapı hâricinde vâki‘ Mevlevîhâne şeyhi olan zevc-i sâbıkı eş-Şeyh Ali Efendi b. Ebûbekir Efendi tarafından husûs-ı âti’l-beyânda ber-vech-i câ’î [ikrâra] vekîl olduğu es-Seyyid Feyzullah b. el-Hâc Hasan ve es-Seyyid Mehmed Çavuş b. es-Seyyid Ali nâm kimesneler şehâdetleriyle şer‘an sâbit ve mütehakkık olan Ahmed Dede b. Ömer nâm kimesne mahzarında ikrâr-ı tâm ve takrîr-i kelâm edip müvekkilim mezbûr eş-Şeyh Ali Efendi ile bundan akdem hâl-i zevciyet beynimizde kāim iken müvekkil-i mezbûrun firâşından hâsıla ve benden mütevellide ve hâlâ bi-hakkı’l-hıdâne hacr ve terbiyemde olan bir buçuk yaşında sadriye kızım Fâtıma nâm sagīrenin mâlı olmayup nafaka ve kisve-bahâya eşedd-i ihtiyâc ile muhtâce olmağla, sagīre-i mezbûrenin nafaka ve kisve ve sâir levâzım-ı zarûriyesi’çün babası mezbûr eş-Şeyh Ali Efendi üzerine kıbel-i şerî‘at-i garrâdan kadr-ı ma‘rûf meblağ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakki‘-i sadr-ı kitâb [bi-] tevkī‘ihi’r-refî‘ü’l-müstetâb ‒tûbâ-lehû ve hüsnü-meâb‒ efendi hazretleri dahi sagīre-i mezbûrenin nafaka ve kisve ve sâir levâzım-ı zarûriyesi’çün babası mezbûr eş-Şeyh Ali Efendi üzerine bi’t-terâzî işbu târih-i vesîkadan külle yevm kırkar akçe nafaka ve kisve-bahâ farz ve takdîr buyurup meblağ-ı mefrûz-ı mezkûru sagīre-i mezbûreye harc ü sarfa ve lede’l-iktizâ istidâneye ve inde’z-zafer babası mezbûr eş-Şeyh Ali Efendi’ye rücû‘a merkūme Hadîce Hatun’a izin vermeğin mâ-vaka‘a bi’t-taleb ketb olundu. Fî 19 Rebî‘ülâhir sene 1193. Şuhûdü’l-hâl: es-Seyyid Feyzullah b. el-Hâc Hasan, es-Seyyid Mehmed Çavuş b. es-Seyyid Ali, el-Hâc Mehmed b. el-Hâc Hasan, Mehmed Said Efendi b. Mehmed Sâdık.